هلمند کې د انارو ۵۰ زره قلمې او ۲۰ کیلو د ناجو تخم وکرل شول
۱۹ وری ۱۴۰۴ ه.ش
۱۰ شَوّالُ المُکَرَّم ۱۴۴۶ه.ق
د هلمند ولایت د کرنې، اوبولګولو او مالدارۍ ریاست اړوند د طبیعي سرچینو امریت له خوا د بولان د نیالګیو روزنې قوریه کې ۵۰ زره د انارو د دوو مختلفو ورایټیو قلمې نیالګي کښینول شول، ترڅو د بڼوالۍ وده، شنه چاپېریال او اقتصادي ارزښت لوړ شي.
همداراز، د یادې قوریې په سیمه کې ۲۰ کیلوګرامه د ناجو تخم هم کرل شوی دی، چې موخه یې د ځنګلي ونو تولید، د خاورې د تثبیت، او د چاپېریال د ساتنې هڅې دي.
د طبیعي سرچینو امریت مسوولین وايي چې دا قلمه شوي نیالګي به د راتلونکو فصلونو لپاره نه یوازې د ولایت دننه بڼوالو ته برابر شي، بلکې له دې لارې به د انارو لوړو حاصلاتو ته لاره هواره او د بڼوالۍ سکتور لا پیاوړی شي.
باید وویل شي، چې یاد اقدام د کرنې ریاست د برنامو یوه مهمه برخه بلل کېږي، چې هم مهاله د طبیعي سرچینو خوندیتوب، بڼوالۍ پراختیا او اقتصادي پیاوړتیا ته زمینه برابروي.
