نورستان کې د عصري کرنې د ترویج پهپار د سبو او حبوباتو ننداریزې کروندې جوړې شوې
۲۰ غویی ۱۴۰۵ه.ش
۲۳ ذُو ٱلْقَعْدَةِ ۱۴۴۷ه.ق
د نورستان ولایت د کرنې، اوبو لګولو او مالدارۍ ریاست له لوري د بزګرانو د ظرفیت لوړولو او عصري کرنیزو لارو چارو د ترویج په موخه د یاد ریاست په انګړ کې د بېلابېلو سبو او حبوباتو ننداریزې کروندې کرل شوې.
دغه ننداریزې کروندې د نورستان د کرنې رییس مولوي محمد ولي محسن په لارښوونه جوړې شوې، چې موخه یې د کرنیزو نوښتونو عملي معرفي کول او د بزګرانو لپاره د زده کړو مناسب فرصت برابرول دي.
د مسؤلینو په وینا، په دغو کرل شویو ننداریزو قطعو کې سایبین، لوبیا، بادرنګ، کچالو، مټر، فاصله، سرې مولۍ، پودینه او جوار شامل دي، چې د سیمې له اقلیم او کرنیزو شرایطو سره سم انتخاب شوي دي.
چارواکي زیاتوي، یادې کروندې به د بزګرانو، زده کوونکو او د کرنې برخې مینهوالو لپاره د عملي او مسلکي زده کړو د مرکز په توګه وکارول شي، څو وخت پر وخت ترې لیدنه وکړي، نوې تجربې ترلاسه کړي او له عصري کرنیزو میتودونو سره عملي بلدتیا ومومي.
د نورستان د کرنې ریاست مسؤلین وایي، د دغو فعالیتونو اساسي موخه د بزګرانو د مسلکي وړتیاوو لوړول، د نويو کرنیزو طریقو دودول او د کرنیزو حاصلاتو زیاتوالی دی، څو د ولایت کرنیز سکتور لا پیاوړی شي.
د یادونې وړ ده، چې ننداریزې کرنیزې کروندې د بزګرانو لپاره د عملي زده کړو اغېزمنه وسیله بلل کېږي، چې له لارې یې کروندګر کولای شي نوې تخنیکونه په مستقیم ډول مشاهده او په خپلو ځمکو کې یې پلي کړي.
