ننګرهار کې ۱۰۰ قصابانو ته د کانګو وینه بهیدونکي تبې ناروغۍ په هکله روزنه ورکړل شوه
۱۴ مرغومې ۱۴۰۲ه.ش
۲۲ جُمَادَى الثاني ۱۴۴۵ ه.ق
د ننګرهار د کرنې، اوبولګولو او مالدارۍ ریاست سره په همغږۍ د ملګرو ملتونو د خوړو او کرنې ادارې له لورې ۱۰۰ تنو قصابانو ته روزنه ورکړل شوه.
د ملګرو ملتونو د خوړو او کرنې ادارې د ختیځ زون مسؤل خوشحال اصفي وویل، چې د جلال اباد ښار او ناحیو ۱۰۰ تنو قصابانو ته د کانګو ویني بهیدونکي تبې ناروغۍ په برخه کې د مسلکي ډاکترانو په مرسته روزنه ورکړل شوه.
نوموړي زیاته کړه قصابان ددې ناروغۍ د اخته کېدو ګواښ سره ډېر مخ دي نو باید له ډېر احتیاط څخه کار واخلي.
د ننګرهار دکرنې، اوبولګولو او مالدارۍ ریاست چارواکي وایي، چې دوی هڅه کوي د وترنرۍ سیمه ییزو کارکوونکو له لورې په ولسوالیو کې عامه پوهاوي ترسره او ځینو سیمو کې د څارویو غوجل او مارکیټونو کې د کنو ضد درملو شېندنه هم ترسره کړي.
د ننګرهار د کرنې ریاست د مالدارۍ خدمتونو او څارویو روغتیا امر ډاکتر ضمیر بهسودې قصابانو ته ددې ناروغۍ د مخنیوي روزنه مهمه وبلله او ددې لړۍ د غځولو او نورو قصابانو ته ددې روزنې برابرولو غوښتنه وکړه.
بهسودي وایې په ننګرهار کې څه باندې ۱۲۰۰ قصابان پدې برخه کې کار کوي نو باید ټول لدې روزنې څخه برخمن شي.
همدارنګه د مالدارۍ امر قصابانو ته د حفظ الصحي مراعت کولو، د امارت د قوانینو مطابق د کړنو ترسره کولو، په مسلخ کې د ذبحې کولو سپارښتنې وکړې او پخپله برخه کې د هر راز همکارۍ ډاډ ورکړ.
