ننګرهار کې پر ۱۶۰ اړمنو کورنیو د مرخېړیو تخمونه وېشل کېږي
۲۰ وږي ۱۴۰۲ه.ش
۲۵ صَفَرُ المُظَفَّر ۱۴۴۵ه.ق
د ننګرهار د کرنې، اوبولګولو او مالدارۍ ریاست په هڅو د ننګرهار مرکز جلال اباد ښار په ګډون شپږو ولسوالیو «سرخ رود، بټي کوټ، کامې، غني خېل، بهسود او مومندرې» کې د اکشن آیډ مؤسسې په تخنیکي همکارۍ او د ملګرو ملتونو د کرنې او خوړو ادارې په مالي لګښت ۱۶۰ تنو هغه مېرمنو ته چې د کورنۍ د نفقي پیداکولو مسولیت ور تر غاړي دي د دوی د اقتصادي پیاوړتیا په پار د مرخیړیو تخمونه ( سپاؤن) ورکول کېږي.
د ننګرهار دکرنې، اوبولګولو او مالدارۍ رییس مولوي عبدالستار محمد وویل، چې هرې ګټي اخیستونکې ته د مرخیړیو تخمونو ترڅنګ د ۲۰۰ ډالرو معادل د مرخیړیو روزلو لپاره وسایل هم ورکول کېږي .
محمد وویل، د مرخیړیو تخمونو د ورکړي موخه دا ده ترڅو په کور دننه بېوزله کورنیو ته د کار زمینه برابره شي؛ د خوړو خوندیتوب رامنځته او کورنۍ پر ځان بسیا شي.
دغه راز د مرخیړیو ترویج او ښي روزنې په برخه کې مختلف روزنیز پروګرامونه هم یادو کسانو ته ورکول کېږي.
ددغو مرستو موخه په دې ولایت کې د مرخیړیو ترویج او روزنې صنعت ته پیاوړتیا ورکول او د بېوزله او کونډو مېرمنو اقتصادي ودې ته په کور دننه زمینه برابرول دي.
