ننګرهار کې د نيالګيو کېنولو پسرلنی ملي کمپاين پيل شو
۸ سلواغه ۱۴۰۴ه.ش
۹ شَعبان المُعَظّم ۱۴۴۷ه.ق
د ننګرهار ولایت د مرستیال والي مولوي غلام الرحمن حیدري په لاس په دې ولایت کې د کرنې ریاست له لوري د «یو نیالګی د ځان او یو د افغانستان لپاره» تر سرلیک لاندې د نیالګیو کېنولو پسرلنی ملي کمپاین پیل شو، چې په ترڅ کې به یې د یاد ریاست له خوا ۴.۷ میلیونه مېوه لرونکي، غیر مېوه لرونکي او زینتي بوټي د ولایت په بېلابېلو سیمو کې کېنول شي.
دغه کمپاین د سلواغې په ۸مه د جلالاباد ښار د غلام حیدرخان له بڼ څخه پیل شو، چې پر مهال یې د ولایت مقام دفتر رییس مولوي شاهد نوراني، د کرنې رییس مولوي محمد ولي محسن، د چاپېریال ساتنې ادارې او یو شمېر نورو دولتي ادارو رییسانو او د رسنیو استازو ګډون درلود.
د ننګرهار مرستیال والي مولوي غلام الرحمن حیدري په خپلو خبرو کې له مسئولینو، علماوو کرامو، قومي مخورو او د ولایت له ټولو اوسېدونکو وغوښتل، چې په دې ملي کمپاین کې فعاله برخه واخلي او خپلې سیمې شنې او سمسورې کړي. نوموړي ټینګار وکړ، هغه نیالګي چې د سږني کمپاین په ترڅ کې کېنول کېږي، باید ثمر ته تر رسېدو پورې یې سمه پالنه او ساتنه وشي.
د ننګرهار د کرنې رییس مولوي محمد ولي محسن وویل، چې د دې کمپاین په لړ کې به د کرنې ریاست، کانال شرکت او خصوصي قوریو کې روزل شوي ۴.۷ میلیونه مېوه لرونکي، غیر مېوه لرونکي او زینتي بوټي د ولایت په بېلابېلو سیمو کې کېنول شي. د هغه په وینا، دغه نیالګي به په امارتي ادارو، جوماتونو، ښوونځیو، مدرسو او نورو عامه ځایونو کې کېنول کېږي.
نوموړي زیاته کړه، چې د نیالګیو د وېش بهیر به په شفاف ډول پر مخ وړل کېږي او په همدې موخه یې خپلو همکارانو ته لازمې سپارښتنې کړې دي. د ننګرهار د کرنې رییس همدارنګه وویل، چې د دې کمپاین اساسي موخه له وچکالۍ او اقلیمي بدلون سره مبارزه، د غذايي خوندیتوب پیاوړتیا، د چاپېریال ساتنه او د اقتصادي ودې لپاره د زمینې برابرول دي.
د یادونې وړ ده، چې د کرنې، اوبو لګولو او مالدارۍ وزارت هر کال د نیالګیو کېنولو ورته کمپاینونه تنظیموي، چې له مخې یې په ګرمو ولایتونو کې د سلواغې او په سړو ولایتونو کې د کب په میاشت کې دغه کمپاینونه دایرېږي، څو د هېواد په کچه شنې سیمې زیاتې، د اقلیم د بدلون اغېزې راکمې او د طبیعي چاپېریال ساتنه لا پیاوړې شي.
