ننګرهار کې د اوبولګولو د دوو کانالونو د بیارغونې چارې پیل شوې

۱۳  لېندۍ ۱۴۰۱ه‍.ش
۱۰ جمادي اﻷول ۱۴۴۴ ه‍.ق
د ننګرهار دکرنې، اوبولګولو او مالدارۍ ریاست د (Islamic Relief) مؤسسې په تخنیکي او د (UNDP) دفتر په مالي لګښت  د ګوشتې ولسوالی اړوند د بیضو او خیر بندۍ کانالونو د رغولو چارې رسماً پیل کړي دي.
په دې اړه جوړه شوې غونډه کې، د ننګرهار دکرنې ریاست د (Islamic Relief) مؤسسې او (UNDP)  ادارې چارواکو، سیمه ییزو چارواکو او یوشېر خلک حضور درلود. 
دننګرهار دکرنې، اوبولګولو او مالدارۍ ریاست چارواکو په خپلو خبرو کې د پروژې مسؤلینو ته سپارښتنې وکړې او زیاته یې کړه، چې د پروژې په تطبیق کې کیفیت ته پاملرنه وکړي او په  شفافه توګه په خپل وخت پروژه تطبیق او ګټې اخستني ته وسپاري، او همداراز ځایي اوسیدونکو څخه یې غوښتنه وکړه، چې د سیمو مسؤلینو سره د پروژې په پلي کولو کې پوره همکاري وکړي.
د چارواکو په خبره ددې پروژې ټولیز لګښت ۱۲.۷ میلیونه افغانۍ ده، چې په ترڅ کې یې د بیضو کانال اته کیلومتره پاک کارۍ او ۵۵۰ مترمکعب سنګ کارۍ او د خیر بندۍ کانال ۴.۷ کیلومتره پاک کارۍ او ۵۵۰ متر مکعب سنګ کارۍ شامل دي.
د دې پروژې په تطبیق سره به په یاد ولسوالی کې نږدې ۲۶۰۰زره جریبه کرنیزه ځمکه خړوبه او لسګونو کسانو ته به د کار زمینه برابره شي.