ننګرهار کانال امارتي شرکت د ګوړې تولید کې د پام وړ پرمختګ کړی
۳۰ لړم ۱۴۰۳ه.ش
۱۸ جُمَادَى الأول ۱۴۴۶ه.ق
د ننګرهار کانال امارتي شرکت د درېیم فارم په سیمه کې د ګنیو اته ګاڼې فعالې کړې دي، چې په شپه او ورځ کې د نږدې ۶۵۰ منه ګوړې د تولید وړتیا لري. د دې تولیدي بهیر په ترڅ کې لسګونه کسانو ته د کار زمینه برابره شوې ده.
ننګرهار، چې د ګني د کرکېلې لپاره مناسب اقلیم، حاصلخېزه ځمکه او پرېمانه اوبه لري، په دودیز ډول د افغانستان د ګني د کر او تولید ستر مرکز ګڼل کېږي. دغه ولایت د ګني کرکېلې په صنعت کې ځانګړی مقام لري او د ننګرهار کانال امارتي شرکت رول په دې برخه کې ډېر مهم دی.
دا هڅه نه یوازې د ګوړې تولید زیاتوي، بلکې د سیمې د خلکو لپاره کاري فرصتونه هم برابروي، چې د اقتصاد پیاوړتیا او د کرنیزو محصولاتو پراختیا کې اغېزمن تمامېږي.
