ننګرهار: د حیواني کلینیک او مالدارۍ برخو د فعالیتونو څخه لیدنه وشوه
۲۵ تله ۱۴۰۱ه.ش
۲۱ ربیعالاول ۱۴۴۴ ه.ق
د ننګرهار د کرنې، اوبولګولو او مالدارۍ رییس مولوی عبدالستار محمد پداسي حال کې چې د مالدارۍ خدمتونو او څارویو روغتیا امر محمد ضمیر بهسودی د دې امریت د مالدارۍ د ترویج لوی مدیر عبدالهادي بابري او د کرنیزو خدمتونو امر نعمت الله اکبري یې ملتیا کوله د مالدارۍ خدمتونو او څارویو روغیتا امریت د حیواني کلینیک او مالدارۍ برخې کې د اوزو او شاتو مچیو فارمونو څخه لیدنه وکړه.
بهسودي د کرنې اداری رییس ته د حیواني کلینیک او مالدارۍ فارمونو په هکله هر اړخیز معلومات ورکړل او زیاته يې کړه چې هره ورځ په لسګونه مالداران خپل مالونه د تداوۍ په موخه دغه کلینیک ته راوړي او د مسؤلینو لخوا يې درملنه ترسره کېږي او د حیواني ناروغیو د مخنیوي په موخه ورته لازمې سپارښتنې کیږي.
د ننګرهار کرنې ادارې رییس خوښې څرګنده کړه او زیاته يې کړه چې د اوزو او شاتو مچیو په روزلو او تکثیر کې باید ګوټلي ګامونه پورته شي، او مالدارانو ته د باکیفیته حیواني نسلونو د روزلو سپارښتنې وشي تر څو دغه سکتور لا پسې پیاوړي شي .
