میدان وردګو کې د چرګانو د تولید او خوراکي دانې ماشینرۍ پر برابرولو سکتوري هوکړه وشوه
۱۰ مرغومې ۱۴۰۴ه.ش
۱۰ رَجَب المُرَجَّب ۱۴۴۷ه.ق
د میدان وردګو ولایت د کرنې، اوبو لګولو او مالدارۍ ریاست په مشرۍ د څلورو اړوندو ادارو ترمنځ سکتوري غونډه ترسره شوه، چې پکې د چرګانو د چرګوړو د تولید او د چرګانو د خوراکي دانې لپاره د ماشینرۍ د تهیه او برابرولو موضوع د ګډونوالو په ګډه خوښه وټاکل شوه.
اده سکتوري غونډه د میدان وردګو ولایت دکرنې، اوبو لګولو او مالدارۍ ریاست د غونډو په تالار کې د کلیو د پراختیا ریاست، د چاپېریال ساتنې ریاست، د اوبو او انرژۍ ریاست او د پېښو پر وړاندې د چمتووالي ریاست په ګډون جوړه شوه. غونډه د قرآن کریم د څو مبارکو آیاتونو په تلاوت پیل شوه او وروسته پکې د نظرونو تبادله او پر بېلابېلو موضوعاتو هر اړخیز بحث وشو.
د غونډې په ترڅ کې د ټولو ګډونوالو نظریات تأیید شول او په پایله کې د چرګانو د چرګوړو د تولید او د چرګانو د خوراکي دانې د ماشینرۍ د برابرولو موضوع د ګډې پرېکړې له مخې د لومړیتوب په توګه وټاکل شوه، چې ټاکل شوې په نږدې وخت کې د ولایتي پراختیايي شورا غونډې ته د تصویب لپاره وړاندې شي.غونډه د ګډ تفاهم او مثبتو پایلو په فضا کې په ښه توګه پای ته ورسېده.
