لښکرګاه بولان سیمه کې کروندګرو ته د نباتي ناروغیو او افتونو د مخنیوي په اړه روزنیز پروګرام ترسره شو
۳۱ وری ۱۴۰۵ه.ش
۳ ذُو ٱلْقَعْدَةِ ۱۴۴۷ه.ق
دهلمند ولایت د کرنې، اوبو لګولو او مالدارۍ ریاست د کرنیزو چارو امریت اړوند د بوټو ساتنې او قرنطین عمومي مدیریت مسلکي کارمندانو د لښکرګاه بولان سیمه کې یو شمېر کروندګرو او بڼوالو ته د نباتي ناروغیو او افتونو د مخنیوي په اړه روزنه ورکړه.
په دې روزنیز پروګرام کې بزګرانو ته د غنمو د سرخي ناروغۍ، د کفشک حشرې، نباتي کنو، نباتي شپږیو، د ریښه خوړونکي چینجي، د میوې مچ او نورو زیانمنو افتونو د پېژندنې او مخنیوي په اړه معلومات وړاندې شول. همداراز د افتونو پر وړاندې د میخانیکي او کیمیاوي لارو چارو عملي او نظري زده کړې هم ور کړل شوې.
دکرنې ریاست کارمندانو پر بزګرانو ټینګار وکړ چې د افتونو د مخنیوي لپاره تر ډېره بریده له میخانیکي لارو چارو څخه کار واخلي او د کیمیاوي درملو له بېځایه او زیات استعمال څخه ډډه وکړي، ځکه دا کار د چاپېریال د ککړتیا لامل ګرځي او په سبو او مېوو کې د جذب له لارې د انسانانو او حیواناتو روغتیا ته زیان رسوي.
همدارنګه بزګرانو ته سپارښتنه وشوه، چې د اړتیا په وخت کې دې له انتخابي او کمضرره درملو څخه کار واخلي، وقایوي تدابیر دې تر درملنې مخکې عملي کړي، هرزه واښه دې له منځه یوسي، مقاوم تخمونه دې وکري، پر وخت دې عضوي او کیمیاوي سرې وکاروي او منظمه اوبه لګونه دې ترسره کړي.
باید وویل شي، چې یادې سپارښتنې به د دې لامل شي چې بزګران باکیفیته حاصلات تر لاسه کړي او اقتصادي وضعیت یې ښه شي.
