لوګر کې پر یوشمېر بزګرانو د سویابینو اصلاح شوي تخمونه ووېشل شو
۲۶ غبرګولی ۱۳۹۸
د لوګر دکرنې، اوبولګولو او مالدارۍ ریاست چارواکي وایي، چې د تغذیې او زده کړې نړیوالې موسسې «NEI» په همکاری یې ددې ولایت د مرکز او ولسوالیو د سویابین کارو ټولنو پر ۱۰۰ غړو د سویابینو اصلاح شوي تخمونه وېشلي دي.
د لوګر دکرنې ریاست وایي پر دغو ۱۰۰ بزګرانو د سویابینو د اصلاح شوي تخمونو د وېش ترڅنګ دوی ته ددې بوټي د کرکېلي، حاصل ټولولو او پالنې په موخه روزنه هم ورکړې ده.
د لوګر د کرنې ریاست وایي، چې د سویابینو د اصلاح شویو تخمونو په وېش سره به ددې ولایت په سل جریبه ځمکه کې د سویابینو کرکېله وشي. په پام کې ده، چې په هره جریبه ځمکه کې ۱۴ کیلو ګرامه د سویابینو تخم وکرل شي.
سویابین بشپړه پروتیني او مغذي مواد لري او د کورنیو په روغتیا په ځانګړي ډول د ماشومانو د خوارځواکۍ په مخنیوی کې رغنده رول لري.
