لوګر کې د کرنیزو محصولاتو مدیریت ۳۰۸ پروژې ګټې اخیستنې ته وسپارل شول
۲۷ لیندۍ ۱۳۹۹
د لوګر د کرنې، اوبولګولو او مالدارۍ ریاست وایي، چې په دې ولایت کې د کرنیزو محصولاتو مدیریت اړوند د ۳۰۸ پروژې چارې بشپړ او ګټې اخیستنې ته سپارل شوي دي.
د لوګر د کرنې رییس عبدالله تسل وویل، چې په دغو پلي شویو پروژو کې ۲۹ ممیزخونې، د کچالو ۱۱۲ زېرمتونونه، د پیازو ۱۳۸ زېرمتونونه او د مڼو درې صفردرجې سړې خونې جوړول او د مېوو او سبو ۲۸ لمریز وچوونکي دستګاوې وېشل شامل دي.
ددغو پروژو ټولیز لګښت نږدې ۱۹۵ میلیونه افغانۍ ده، چې ۹۰ سلنه یې د کرنې وزارت او لس سلنه نور یې برخمن شوي بزګران پرې کړي دي.
په لوګر ولایت کې یادې پروژې پلي کېدل ددې ولایت د بزګرانو او بڼوالو د خوښۍ لامل شوي دي. دوی وایي، چې یاد پلي شوي پروژې کولای شي، چې د کرنې او بڼوالۍ په وده کې رغنده رول لوبوي او د ولایت په کچه د اقتصادي ودې لامل شي.
