لوګر کې دکرنیزو محصولاتو نندارتون په لاره واچول شوه
۲۴ وږی ۱۴۰۱ه.ش
۱۸ صَفَرالمظفّر ۱۴۴۴ ه.ق
دکرنې، اوبولګولو او مالدارۍ وزارت سرپرست وزیر، د لوګر والي، دولتي چارواکو، سوداګرو، دکرنې ریاست کارکوونکو او یوشمېر بزګرانو په ګډون سره د لوګر په ولایت کې دکرنیزو محصولاتو نندارتون په لاره واچول شوه.
دکرنې، اوبولګولو او مالدارۍ وزارت سرپرست وزیر مولوی عطاء الله عمري، چې ددې نندارتون پرانیست غونډه کې ګډون کړی و وویل: «خوښ یو، چې له کلونو جنګ او جګړې وروسته د امن، ورورولۍ او سولې په فضا کې د خپلو کورنیو تولیداتو او محصولاتو لپاره جشن نیسو، کرنه اومالدارۍ د هېواد د اقتصاد د ملاتیر دي، موږ د خپلو بزګرانو او مالدارانو ملاتړ ته ژمن یو.»
په همدې حال کې، د لوګر دکرنې رییس د یاد ولایت دکرنې ریاست یو کلن کړنې بیان کړل او ویې ویل: «د یوکال په ترڅ کې، موږ د خوړو په بدل کې د کار پروګرام له لارې د لوګر ولایت د مرکز او ولسوالیو ۱۷۳ کیلومتره سړکونه جغل اچونه کړې، کاریزونه مو پاک کړي دي، د عشر او ذکاتو له لارې مو څه باندې درې میلیونه افغانۍ راټول کړي دي.»
هاشمي زیاته کړه؛ د څه باندې ۲۱ زره څارویو درملنه، د بېکیفیته درملو راټولول، د حیواني ناروغیو ټسټ، د چرګانو قطعاتو وېشل، د پیله وری روزنه او د کرنې او مالدارۍ برخو څخه نظارت د مالدارۍ په برخه کې ددې ریاست کړنې دي.
هغه زیاته کړه: «په دې ولایت کې نږدې ۳۰۰ مټریک ټنه اصلاح شوي تخمونه وېشل شوي دي، څه باندې ۲۳۲ جریبه مثمر بڼونه احداث شوي دي، ۱۰۰ شنې خونې جوړې شوي دي، مثمر او غیر مثمر نیالګي وېشل شوي دي او د نباتي ناروغیو پر وړاندې مبارزه ترسره شوې ده.»
د لوګر ولایت د هغو ولایتونو په ډله کې ده، چې ډېری وګړي یې په کرنه او مالدارۍ بوخت دي، او د کرنې او مالدارۍ له لارې خپل عواید ترلاسه کوي.
