لوګر ته دکرنې او مالدارۍ مرستیال سفر
۲۴ سلواغه ۱۴۰۱ه.ش
۲۲ رَجَب المُرَجَّب ۱۴۴۴ ه.ق
د کرنې، اوبولګولو او مالدارۍ وزارت دکرنې او مالدارۍ مرستیال مولوی صدراعظم لوګر ولایت ته د سفر په ترڅ کې په دې ولایت کې د سوداګرۍ او پانګونې خونې د پرانیستلو ترڅنګ د لوګر دکرنې ریاست له چارواکو او کارکوونکو سره په کتنه کې د دوی ستونزې او وړاندېزونه واورېدل.
دکرنې او مالدارۍ مرستیال مولوی صدراعظم د لوګر په ولایت کې د سوداګرۍ او پانګونې خونې په پرانیست غونډه کې وویل، چې د لوګر ولایت نږدې ۸۵ سلنه وګړي په کرنه او مالدارۍ بوخت دي، چې د سوداګرۍ او پانګونې خونې د کار په پیل سره به د دوی اقتصادي ودې ته زمینه برابره او شته ستونزې به یې ورسره تر ډېره حل شي. مولوی صدراعظم دغه راز د سوداګرۍ او پانګونې خونې له چارواکو وغوښتل، چې د کرنې او مالدارۍ په سکټور کې پانګونه وکړي، هغه وویل: «له سوداګرو او پانګوالو غواړم، چې دکرنې او مالدارۍ په سکټور کې پانګونه وکړي، دکرنې وزارت ژمن دی، چې دوی ته به اسانتیاوې برابرې او هر اړخیزې همکارۍ به ورسره وکړي.»
دکرنې او مالدارۍ مرستیال مولوی صدراعظم د سوداګرۍ او پانګونې خونې له پرانیست غونډې وروسته د لوګر دکرنې، اوبولګولو او مالدارۍ ریاست له کارکوونکو او چارواکو سره په غونډه کې د دوی ستونزې او نظرونه واورېدل او د ستونزو د حل ژمنه یې وکړه.
