فراه کې د شنوخونو د مدیریت روزنیز پروګرام پیل شو

۳۰ لیندۍ ۱۴۰۴ هـ.ش
۳۰ جُمَادَى الثاني ۱۴۴۷ هـ.ق
د فراه ولایت د کرنې، اوبولګولو او مالدارۍ ریاست په هڅو او د «واسا» مؤسسې په همکارۍ، د شنوخونو د مدیریت په برخه کې ۸۰ تنو ته پنځه ورځنۍ روزنیزه برنامه نن د دغه ولایت په مرکز کې رسماً پیل شوه.
د یادې روزنې په ترڅ کې ګډونوالو ته د شنوخونو د سم مدیریت، د سبو د کرلو عصري لارې چارې، د حاصلاتو لوړولو لارې چارې، د افتونو او ناروغیو مخنیوی، او د بازارموندنې بنسټیز اصول ور زده کېږي، څو وکولای شي له لږو ځمکو څخه زیات او باکیفیته حاصل تر لاسه کړي.
د پروګرام له بشپړېدو وروسته به د یادې روزنې له ګډونوالو سره په اشتراکي ډول لس بابه معیاري شنې خونې جوړې شي، چې هره شنه خونه به د اته کسانو ترمنځ شریکه وي. د دغو شنوخونو جوړول به ګډونوالو ته عملي کاري فرصتونه برابر کړي او د هغوی د عاید د لوړولو لامل به شي.
د فراه ولایت د کرنې، اوبولګولو او مالدارۍ ریاست مسوولین وايي، د دې مرستو اساسي موخه هغو کډوالو ته د کار زمینه برابرول دي، چې په دې وروستیو کې هېواد ته راستانه شوي، تر څو د کرنې له لارې اقتصادي پیاوړتیا ومومي او د خپلو کورنیو د ژوند اړتیاوې پوره کړي.
همدارنګه دغه پروګرام د شنوخونو صنعت ته د ودې او پراختیا، د لږو ځمکو څخه د زیاتو حاصلاتو د ترلاسه کولو، او بزګرانو ته د دوامدار او عملي ملاتړ د برابرولو په موخه پلی کېږي.
د فراه دکرنې ریاست چارواکي، چې په راتلونکي کې به هم د ملي او نړۍوالو همکارو مؤسسو سره په همغږۍ ورته روزنیز او حمایوي پروګرامونه عملي کړي، څو د فراه ولایت د بزګرانو اقتصادي وضعیت ښه شي او د کرنیز سکتور وده لا چټکه شي.