سږ کال افغانستان کې له ۱۵۸ زره متریک ټنو زیاته پنبه راټوله شوې
۱۵ سلواغه ۱۴۰۴ه.ش
۱۶ شَعبان المُعَظّم ۱۴۴۷ه.ق
د کرنې، اوبولګولو او مالدارۍ وزارت د کرنیزې احصایې او معلوماتو ریاست شمېرې ښيي، چې روان کال په ټول هېواد کې ۱۵۸ زره او ۲۰۵ متریک ټنه پنبه تر لاسه شوې ده.
د هلمند، بلخ، جوزجان او کندهار ولایتونو کې، چې د پنبې کښت تر ټولو زیاتې سیمې لري، په روان کال کې د تولید تر ټولو لوړه کچه ثبت کړې ده. سربېره پر دې، پنبه په پراخه کچه په فراه، ننګرهار، نیمروز، سمنګان، بغلان، کندز او تخار ولایتونو کې هم کرل شوې او حاصلات یې تر لاسه شوي دي. سږ کال د هېواد په کچه له ۱۰۴ زره او ۲۳۶ هکټاره زیاته ځمکه د پنبې کرکېلې ته ځانګړې شوې وه، چې ښه حاصلات یې ورکړي دي.
پنبه د افغانستان له مهمو کرنیزو او صادراتي محصولاتو څخه شمېرل کېږي، چې د مناسب بازار او د قناعت وړ بیې له امله د کوکنارو د کښت د بدیل په توګه مطرح ده. د کرنې، اوبولګولو او مالدارۍ وزارت په خپل پنځهکلن پلان کې پنبه د لوړ ارزښت لرونکی او د کوکنارو د کښت بدیل محصول بللی او هوډ لري، چې تولیدات یې زیات کړي او ورته نړۍوال بازار رامنځته کړي.
