سمنګان کې ۱۵۰ بزګرانو ته د اقلیمي بدلونونو په اړه د پوهاوي پروګرامونه ترسره شول
۲۴ تله ۱۴۰۴ هـ.ش
۲۳ رَبِیعُ الْثاني ۱۴۴۷ هـ.ق
د کرنې، اوبولګولو او مالدارۍ وزارت اړوند د «کرنې او مالدارۍ سکتور د اقلیمي بدلونونو سره د سازښت ریاست» د ابتکار له مخې، د سمنګان ولایت په مرکز او څلورو ولسوالیو کې د اقلیمي بدلونونو په اړه د پوهاوي پروګرامونه ترسره شول، چې له لارې یې ۱۵۰ بزګرانو عملي زدهکړې ترلاسه کړې.
د اقلیمي بدلونونو د پوهاوي دا ښوونیز پروګرامونه د سمنګان ولایت په مرکز او څلورو ولسوالیو ـ حضرت سلطان، فیروز نخچیر، خُرم و سارباغ او خُلم ـ کې د کرنې، اوبولګولو او مالدارۍ وزارت اړوند د «کرنې او مالدارۍ سکتور د اقلیمي بدلونونو سره د سازښت ریاست» لهخوا ترسره شوي دي.
دغه پروګرامونه، چې د یاد ریاست د کلني پلان یوه برخه ده، د هېواد په ۱۴ ولایتونو کې د ۲۱۰۰ بزګرانو د پوهاوي د لوړولو په موخه عملي کېږي. په سمنګان کې د یادو پروګرامونو پر مهال د سیمې د دیني عالمانو، ملکانو او بزګرانو پراخه ونډه درلوده.
د یاد ریاست آمر، انجنیر جاوید امین، وویل چې ګډونوالو ته د سمنګان د اقلیمي وضعیت، د اقلیم او اقلیمي بدلون مفاهیمو، د بدلون عواملو، پر کرنه او مالدارۍ اغېزو، د سازګارۍ لارو چارو او د مخکیني خبراوي د سیستم په اړه مفصل معلومات وړاندې شول.
نوموړي زیاته کړه، چې د دغو پروګرامونو په ترڅ کې د اقلیمي بدلونونو سره د سازښت او چاپېریالي پېښو د مخنیوي په اړه هم معلوماتي پرېزنټېشنونه ترسره شول.
ګډونوالو د پروګرامونو له ترسره کېدو خوښي څرګنده کړه او باور یې څرګند کړ چې دا ډول روزنیز فعالیتونه د کرنیزو زیانونو د کمولو، د بزګرانو د مهارتونو د لوړولو او د اقلیمي بدلون پر وړاندې د عملي تدابیرو د پیاوړتیا لپاره اغېزناک رول لري.
د کرنې، اوبولګولو او مالدارۍ وزارت اړوند د اقلیمي بدلونونو سره د سازښت ریاست وايي، د بزګرانو د پوهاوي لوړول د دغه ریاست د کلني پلان له مهمو لومړیتوبونو څخه دي او دا ډول پروګرامونه د ټولنې د ګډې مبارزې او سازګارۍ د پیاوړتیا په برخه کې حیاتي ارزښت لري.
