راستنېدونکو کډوالو سره د مرستې په پارهڅې؛ ۱۴۰۰ کسانو سره مرسته وشوه

١۵ لړم ۱۴۰۲ه‍.ش
٢۲ ربیع‌الثاني ۱۴۴۵ ه‍.ق
د ننګرهار د کرنې، اوبولګولو او مالدارۍ ریاست په هڅو د سپین غر د چرګانو روزنې ټولنې په همکارۍ ۱۴۰۰ بېرته ستنېدونکو هېوادوالو سره د تیارو سره کړو چرګانو مرسته وکړه.
د ننګرهار د کرنې، اوبولګولو او مالدارۍ رییس مولوي عبدالستار محمد وویل د ننګرهارسپین غر چرګانو روزنې ټولنې پاکستان څخه بېرته راستنېدونکو هېوادوالو سره د ۱۴۰۰ تنو لپاره د تیار پخو شویو چرګانو مرسته وکړه.
د ننګرهار دکرنې رییس زیاته کړه د مرستې په هره بسته کې د دوه تنو لپاره یو سور کړی چرګ،  دوه ډوډۍ او دوه بوتله اوبه ورکول کېږي.
د یادې ټولنې مسولینو ژمنه وکړه، چې تر راتلونکې څو ورځو پوري به هره ورځ ۱۰۰۰ تنو ته ډوډۍ برابروي. 
دا مرستې په داسې حال کې ترسره کېږي، چې څو ورځې وړاندې د کرنې وزارت مالي او اداري مرستیال مولوي فضل الباري فضلي او له پاکستان څخه د راستنېدونکو کډوالو د کمېسیون غړی د ننګرهار ولایت له یو شمېر سیمه ییزو چارواکو سره د تورخم بندر ته ولاړ او هلته یې کډوالو لپاره د موقتې سرپناه، د څښاک اوبه، خوراکي توکو او تشنابونو زمینه برابره کړه. 
 د کرنې وزارت مالي او اداري مرستیال مولوي فضل الباري فضلي د ننګرهار د کرنې ریاست او د ننګرهار د کانال شرکت کارکوونکو ته لارښوونه وکړه، چې کډوالو لپاره د موقتي سرپناه د جوړولو په موخه خیمې جوړې کړي، چې راستنېدونکي کډوال په کې د قانوني پړاوونو تر بشبړېدو پورې مېشت شي. 
د يادونې وړ ده، چې د کرنې وزارت د رهبرۍ په لارښوونه د ننګرهار دکرنې ریاست او  د کانال شرکت کارکوونکو راستنېدونکو کډوالو لپاره د لازمو اسانتياوو په برابرولو کې هېڅ ډول هڅې نه دي سپمولي او د تورخم له بندر څخه د راستنېدونکو کډوالو د موقتي سرپناه لپاره يې سلګونه خيمې برابرې کړې دي. 
 وروسته له هغه چې پاکستان له هغه هېواده د افغان کډوالو د اجباري شړلو د بشري قوانينو خلاف پرېکړه وکړه، هره ورځ د تورخم او کندهار له سپين بولدک بندر څخه زرګونه کسان افغانستان ته داخلېږي.
په همدې موخه د افغانستان اسلامي امارت د مشرتابه پلاوی په لارښوونه له پاکستان څخه د راستنیدونکو کډوالو لپاره د لازمو اسانتیاوو د برابرولو په موخه د امارت له څو ادارو څخه یو کمیسیون جوړ شوی دی، ترڅو له پاکستان څخه راستنېدونکو کډوالو لپاره لازمې اسانتیاوې برابرې کړي.