د کونړ دکرنې ریاست: خاص کونړ ولسوالۍ کې د سکاونو موسسې له لوري د چرګانو د وېش پروګرام پلی شو
۴ مرغومې ۱۴۰۴هـ.ش
۴ رَجَب المُرَجَّب ۱۴۴۷هـ.ق
د کونړ ولایت د خاص کونړ ولسوالۍ په کچه د سکاونو موسسې له لوري د چرګانو د وېش بهیر په منظم او رسمي ډول ترسره شو، چې پکې دکونړ د کرنې، اوبو لګولو او مالدارۍ ریاست مشرتابه او تخنیکي پلاوي ګډون درلود.
په یاد پروګرام کې د کونړ د کرنې، اوبو لګولو او مالدارۍ رییس مولوي محمد سرور صادق، د مالدارۍ خدماتو او د څارويو د روغتيا محترم آمر سید احمد ګل هېوادمل، د پلان او برنامو عمومي مدیر موسی نورزی، د ریاست مشاور سید حفیظ الله سادات او ورسره مل تخنیکي پلاوي ګډون کړی و.
د سکاونو موسسې له خوا د خاص کونړ ولسوالۍ په بېلابېلو کلیو کې څلور محلي ټولګي جوړ شوي وو، چې په هر ټولګي کې ۱۵ تنه زدهکوونکي شامل وو. یادو ګډونوالو ته د چرګانو د روزنې، ساتنې، تغذیې او روغتیا په برخه کې اړینې نظري او عملي روزنې د اړونده استاد له لوري وړاندې شوې وې.
د پروګرام په ترڅ کې هر زدهکوونکي ته ۱۵ عدده چرګان، دوه د اوبو لوښي، دوه د دانې لوښي، د هګیو د راټولولو وسایل او ۵۰ کیلو ګرامه دانه ووېشل شوه.
یاد پروګرام د مالدارۍ د ودې، د کورني اقتصاد د پیاوړتیا او د خلکو د عاید د لوړولو په موخه تطبیق شوی دی.
