د کندهار پنجوایي کې د ۳.۸ میلیونه افغانیو په ارزښت د استنادي دېوال د جوړولو چارې په بشپړېدو دي
۱۰ غویی ۱۴۰۴ ه.ش
۲ ذُو ٱلْقَعْدَةِ ۱۴۴۶ه.ق
د کندهار کرنې، اوبو لګولو او مالدارۍ ریاست د پراختیایي بودیجې په ملاتړ، د خصوصي ودانیز شرکت په تخنیکي همکارۍ او د طبیعي سرچینو آمریت تر مستقیمې څارنې لاندې، د پنجوایي ولسوالۍ د بدوان په سیمه کې د اوبو مهارولو په موخه د استنادي دیوال د جوړولو چارې روانې دي. دا پروژه، چې ۳.۸ میلیونه افغانۍ ارزښت لري، رغنیزې چارې یې په بشپړېدو دي، چې په نږدې راتلونکې کې به ګټې اخیستنې ته وسپارل شي.
یاد استنادي دیوال ۲۶۵ متره اوږدوالی، ۱.۵ متره پراخوالی او ۳ متره لوړوالی لري او تمه ده چې د دوو میاشتو په موده کې په اساسي او پایداره ډول بشپړ شي. د دې پروژې د تطبیق پر مهال، ۸ کسانو ته په فني او ۵۰ کسانو ته په غیرفني برخو کې د کار زمینه برابرې شوې او د چارو د ښه ترسراوي لپاره له پرمختللو ماشینونو هم استفاده کېږي.
د ودانیزو چارو د کیفیت، چټک پرمختګ او لا ښه مدیریت لپاره، د کرنې ریاست استازو مولوی عبدالغني عفان او انجنیر نورمحمد همکار د پروژې نږدې څارنه وکړه. د څارنې پر مهال، د کار د کیفیت ارزونه وشوه او اړوندو مسؤلینو ته لازمې سپارښتنې ورکړل شوې، ترڅو ټولې چارې د تخنیکي معیارونو او کرنیزو اړتیاوو مطابق پر مخ یووړل شي.
د یادونې وړ ده، چې د کندهار د کرنې، اوبو لګولو او مالدارۍ ریاست ژمن دی، چې د خپلو ټولو پروژو پر وخت څارنه وکړي، د کیفیت لوړتیا ته پاملرنه وکړي او د کرنیزو چارو د ښه والي لپاره دوامداره حللارې رامنځته کړي.
