د کندهار غورک کې یو زر او ۵۰۰ بزګرانو ته د غنمو اصلاح شوی تخم او کیمیاوي سره ووېشل شوه  

د کندهار ولایت د کرنې، اوبو لګولو او مالدارۍ ریاست په هڅو، د خوراک او کرنې نړیوال سازمان (ایف. اې. او) په مالي ملاتړ، د اکټیډ مؤسسې په تخنیکي همکارۍ او د غورک ولسوالۍ د کرنې او مالدارۍ مسؤلینو تر څارنې لاندې یو زر او ۵۰۰ اړمنو بزګرانو ته د غنمو اصلاح شوی تخم او کیمیاوي سره ووېشل شوه.
په دې مرسته کې هر بزګر ته ۵۰ کیلو ګرامه د غنمو اصلاح شوی تخم، ۵۰ کیلو سپینه سره او ۵۰ کیلو توره سره ورکړل شوه. د دې مرستې موخه د بزګرانو د حاصلاتو کچې لوړول، د کمې ځمکې څخه د زیات تولید ترلاسه کول او د بزګرانو اقتصادي وضعیت ښه کول دي. د اصلاح شویو تخمونو او کیمیاوي سرو وېش به د غنمو حاصلاتو کې د پام وړ زیاتوالی رامنځته کړي.
د غورک بزګرانو د دې مرستې هرکلی وکړ او د کرنې سکتور د پرمختګ لپاره یې د ورته ملاتړ غوښتنه وکړه.
همدارنګه، تېره ورځ په ژړۍ ولسوالۍ کې هم دوه زره اړمنو بزګرانو ته د ورته مرستې وېش ترسره شوی و، چې د بزګرانو له مثبت غبرګون سره مخ شو. د یادو مرستو ترسره کول د کرنې سکتور د پراختیا لپاره یوه مهمه هڅه ګڼل کېږي.