د کندهار سپین بولدک کې له یوشمېر قصابیو څخه څارنه وشوه
د کندهار د کرنې، اوبو لګولو او مالدارۍ ریاست تر رهبرۍ لاندې، د مالدارۍ آمریت یو پلاوی د سپین بولدک ولسوالی ته سفر وکړ، ترڅو د قصابیو او څارویو مسلخ څخه څارنه وکړي. په دې څارنه کې د مالدارۍ آمر حافظ حمیدالله او د کوچنیو څارویو متخصص ډاکټر توریالي قیام ګډون درلود.
د څارنې په ترڅ کې، پلاوي د سپین بولدک ولسوالی د قصابیو او مسلخ نږدې ارزونه وکړه. دغه څارنه چې د یوې ورځې په اوږدو کې ترسره شوه، د یادې ولسوالۍ د ګڼ شمېر قصابیو نظارت وشو. همداراز، غوښه پلورونکو ته د حفظ الصحې اصولو مراعتولو، د قصابیو پاکوالي ته پاملرنې، او د تازه او قانوني غوښو پلور ته د ژمنتیا سپارښتنه وشوه.
په پای کې د ولسوالی د مسلخ وضعیت هم و ارزول شو. د څارنې پر مهال، د مسلخ مسؤلینو ټینګار وکړ چې له سپین بولدک ولسوالی څخه د باندې د نورو سیمو د غوښو راوړلو ته اړتیا نه لیدل کیږي، ځکه چې بولدک اوس د غوښو له اړخه پر ځان بسیا دی او د نورو ولسوالیو او سیمو غوښو ته اړتیا نه لري.
د یادونې وړ ده، چې د مالدارۍ آمریت په دې وروستیو کې د پاکو او صحي غوښو د پلور ته ځانګړې پاملرنه کړې، او په یو شمېر ولسوالیو کې یې د څارویو د معاینه کولو او روغتیايي ارزونې لپاره د مسلخ مرکزونه جوړ کړي، ترڅو هیوادوال له پاکو او معیاري غوښو څخه ګټه واخلي.
