د کندهار د کرنې ریاست ۲۰ کارکوونکي د ملکیتونو د تثبیت واحد مرکز له مسلکي روزنې فارغ شول
۲۰ برګولی ۱۴۰۵ هـ.ش
۲۴ ذُوالحجّة ۱۴۴۷ هـ.ق
د کندهار ولایت د کرنې، اوبو لګولو او مالدارۍ ریاست ۲۰ تنه کارکوونکي د ملکیتونو د تثبیت واحد مرکز اړوند له تخصصي او مسلکي روزنیز پروګرام څخه په بریالیتوب فارغ شول.
د مسؤلینو په وینا، دغو کارکوونکو ته د درېیو ورځو په موده کې د ملکیتونو د تثبیت واحد مرکز په برخه کې هر اړخیزې نظري او عملي زده کړې ورکړل شوې، ترڅو وکولای شي د خپلو دندو په سیمو کې په اغېزمنه او مسلکي توګه فعالیت وکړي او د عامو خلکو ستونزو ته پر وخت او چټک رسېدنه یقیني کړي.
د فراغت په مراسمو کې د کندهار د کرنې رییس مولوي عبدالرشید منیب د ظرفیت لوړونې پروګرامونو پر اهمیت ټینګار وکړ او ویې ویل، چې د کارکوونکو مسلکي روزنه د ادارې د فعالیتونو د ښه والي، د خدماتو د کیفیت لوړولو او د ولسونو د ستونزو د اغېزمن حل لپاره مهمه اړتیا ده.
نوموړي زیاته کړه، چې د کندهار د کرنې ریاست هڅه کوي چې د خپلو کارکوونکو تخنیکي او مسلکي وړتیاوې لا پیاوړې کړي، ترڅو د ځمکو، ملکیتونو او کرنیزو چارو اړوند خدمات په معیاري او منظم ډول وړاندې شي.
د کندهار د کرنې، اوبو لګولو او مالدارۍ ریاست په وروستیو میاشتو کې د خپلو کارکوونکو د ظرفیت لوړونې لپاره یو لړ روزنیز پروګرامونه پلي کړي دي. د همدې لړۍ په دوام، شاوخوا یوه میاشت وړاندې هم د یاد ریاست ۵۰ تنه کارکوونکي د کادستر او ځمکو د ثبت په برخه کې له نظري او عملي زده کړو برخمن شوي وو.
دغه روزنیز پروګرامونه د دې لپاره ترسره کېږي، چې د ادارې کارکوونکي په مسلکي مهارتونو سمبال شي، اداري چارې په چټکۍ او شفافیت سره پرمخ ولاړې شي او د خلکو ستونزې په اغېزمن او پر وخت ډول حل شي.
