د کندهار دوو ولسوالیو کې ۱۱۰ بڼوالو ته د انګورو د حاصلاتو لوړولو توکي ووېشل شول
۳۰ لیندۍ ۱۴۰۴ هـ.ش
۳۰ جُمَادَى الثاني ۱۴۴۷ هـ.ق
د کندهار دکرنې، اوبو لګولو او مالدارۍ ریاست په هڅو، د اروپایي ټولنې په مالي ملاتړ او د سولي بنسټ مؤسسې په تخنیکي همکارۍ د نېش او میوند ولسوالیو ۱۱۰ تنه د انګورو بڼوالو ته د انګورو د بڼونو د ظرفیت، کیفیت او حاصلاتو لوړولو په موخه اړین توکي ووېشل شول.
د کندهار دکرنې ریاست چارواکي وایي، چې په یادو توکو کې هر بڼوال ته ۵۰ کیلو سپینه سره، ۲۵ کیلو پوټاشیم سلفیټ، د لایم سلفر د جوړولو لپاره یو کیلو چونه (آهاک)، دوه کیلو سلفر او یوه برقي (الکترونیکي) د درمل شیندنې ډبه ورکول شوه، ترڅو د بڼونو حاصلات او کیفیت لوړ شي.
د چارواکو په وینا، د مرستې تر څنګ یادو بڼوالو لپاره د انګورو د سمې روزنې او د ورکړل شویو توکو د اغېزمن استعمال په موخه یو ورځنی عملي او نظري روزنیز پروګرام هم ترسره شو، چې په کې بڼوال د انګورو د عصري او نويو کرنیزو میتودونو سره بلد شول.
د دې مرستې موخه د بزګرانو مالي ملاتړ، د انګورو د حاصلاتو او کیفیت لوړول او د بڼونو روزنه په معیاري ډول ترسره کول دي، تر څو بزګران د عصري کرنې له نويو لارو چارو څخه ګټه پورته کړي.
د یادونې وړ ده، چې د کندهار د کرنې ریاست د انګورو د حاصلاتو زیاتوالي او د بڼوالو د علمي سویې لوړولو لپاره هڅې روانې ساتلې، ترڅو بزګران په مسلکي توګه وروزل شي او کرنیز تولیدات یې زیات شي.
