د کندهار دوو ولسوالیو کې یوشمېر بڼوالو ته معیاري بڼونه جوړېږي
۲۰ سلواغه ۱۴۰۳ه.ش
۹ شَعبان المُعَظّم ۱۴۴۶ه.ق
د کندهار د کرنې، اوبو لګولو او مالدارۍ ریاست په هڅه، د ملګرو ملتونو د خوړو او کرنې ادارې په مالي او د «او،اچ،ډبلیو» مؤسسې په تخنیکي همکارۍ ددې ولایت د پنجوایي او معروف په ولسوالی کې یوشمېر بڼوالو ته د پلمې او ایته انګورو معیاري بڼونه جوړېږي.
د کندهار دکرنې ریاست چارواکي وايي، چې ددې پروسې په ترڅ کې د پنجوایي ولسوالی ۷ تنو اړمنو بڼوالو ته پر ۷ جریبه ځمکه د پلمې مېوې بڼونه جوړېږي، چې یاد بڼونه د مسلکي انجنیرانو له لوري د پنجوایې ولسوالی په صالحانو، سفیدروان او جمراسي سیمو کې ډیزاین شوی، چې له مخې به یې هر بزګر ته پر یو جریب ځمکه یو بڼ په معیاري ډول جوړ شي.
بلخوا د کندهار د معروف په ولسوالی کې هم ۱۰ تنو اړمنو بڼوالو ته پر ۱۰ جریبه ځمکه د ایته انګورو بڼونه ړېږي. د چارواکو په خبره یاد بڼونه د مسلکي انجنیرانو له لوري د معروف ولسوالۍ په پیرزي، خوګیاڼي، محمدزي غونډي، کورزیزي، کښته شغزي او سوګنی سیمو کې جوړیږي، چې له مخې به یې هر بزګر ته پر یو جریب ځمکه یو بڼ جوړ شي او ورسره ترڅنګ به ۳۳۳ د ایته انګور نیالګي هم ورکول کېږي.
همداراز، د دې بڼونو د ښه، اساسي او پایداره جوړښت لپاره، بڼوالو ته روزنه هم ورکړل شوي، چې په دې روزنه کې بڼوالو ته د ځمکې منظم چمتووالی، د نیالګیو منظم اېښودل، د نیالګیو دکتارونو ترمنځ د مناسب فاصلي پرېښودل، د اوبو د منظم سیستم رامنځته کول، او ورته اړینې سپارښتنې وشوې، ترڅو بڼونه یې په ښه توګه وده وکړي.
د دې بڼونو جوړولو موخه د بزګرانو اقتصادي ملاتړ، دایته انګورو او د پلمې مېوو پراختیا، د بزګرانو ځان بسیاینه، او د هغوی لپاره د کار زمینه برابرول دي.
