د کندهار درېیو ولسوالیو کې ۱۴۰ بیوزلو کورنیو ته د هګیو چرګې ووېشل شوې
۲۵ مرغومې ۱۴۰۴ه.ش
۲۵ رَجَب المُرَجَّب ۱۴۴۷ه.ق
د کندهار د کرنې، اوبو لګولو او مالدارۍ ریاست په هڅو، د «ډې.آر.سې» ادارې په مالي ملاتړ، د بشري خیریه مؤسسې (او.ایچ.ډبیلو) په تخنیکي همکارۍ د کندهار دامان، ارغستان او خاکریز ولسوالیو کې ۱۴۰ بېوزلو او اړمنو کورنیو ته د هګیو چرکې، خوراکه او اړین توکي ووېشل شول.
د کندهار دکرنې ریاست د مالدارۍ چارواکي وایي، چې په دې مرسته کې هري کورنۍ ته ۳ چرګان، ۲۷ د هګیو چرګې، ۱۵۰ کیلو ګرامه د چرګانو خوراکه، ۳۰ ګرامه مولټي ویټامین، ۳ داني د اوبو لوښي او ۳ داني دانه خوری ووېشل شوې.
د یادې مرستې موخه د بیوزلو کورنیو ملاتړ، کوچني کورنیو اقتصاد راپورته کول، د بیوزلو کورنیو اقتصاد ته وده او پراختیا ورکول دي.
د یادونې وړ ده، چې څه باندې یوه میاشت وړاندې د همدې مرستي په لړ کې یادو کورنیو ته د فارم جوړولو لپاره ودانیز او بنسټیز توکي هم وېشل شوې وه.
