د کندهار خاکریز کې د ۱۸ میلیونه افغانیو په ارزښت دوه چکډېمونه جوړېږي
۶ کب ۱۴۰۳ه.ش
۲۵ شَعبان المُعَظّم ۱۴۴۶ه.ق
د کندهار ولایت مقام په ځانګړې لارښونه، د کندهار د کرنې، اوبو لګولو او مالدارۍ ریاست په تخنیکي او مسلکي همکارۍ، د اقتصاد او کلیو پراختیا ریاست په همغږۍ او د کانونو ریاست په پراختیایي بودیجه، د کندهار خاکریز ولسوالی د بي بي ګوهر او تمبیل په سیمه کې د ۱۸ میلیونه افغانیو په ارزښت دوه چکډېمونه جوړېږي، چې تخنیکي سروي یې د کرنې ریاست انجنیرانو او اړوندو ریاستونو استازو له لوري ترسره شوه.
د کندهار دکرنې ریاست د طبیعي سرچینو آمریت انجنیر روح الله روحاني وایي، چې د یادو چکډېمونو د جوړېدو چارې به د راتلونکو اونیو په لړ کې پیل شي، چې په ترڅ کې به یې د اوبو زېرمه کولو دوه چکډېمونه په اساسي او پایدار ډول جوړ شي. نوموړي زیاته کړه، چې د چکډېمونو په رغنیزو چارو کې به د یادې ولسوالی سیمهییزو اوسېدونکو ته د لنډ وخت لپاره د کار زمینه هم برابره شي.
د غو چکډېمونو د جوړېدو موخه د اورښتونو د اوبو راټولول، د ځمکې لاندې د اوبو سطحې لوړول، او د بزګرانو او مالدارانو لپاره د اوبو ستونزې کمول دي.
د یادونې وړ ده، چې دوه اوونۍ وړاندې د کندهار د ارغستان ولسوالی په سردرې سیمه کې د ۳.۴ میلیونه افغانیو په ارزښت یو چکډېم جوړ او ګټې اخیستنې ته وسپارل شو.
