د کرنې وزارت مشرتابه کابل کې له ازبېکستاني پلاوي سره وکتل
۲۶ وری ۱۴۰۵ه.ش
۲۸ شَوّالُ المُکَرَّم ۱۴۴۷ه.ق
د کرنې، اوبو لګولو او مالدارۍ وزیر مولوي عطاءالله عمري او د دې وزارت مالي او اداري مرستیال مولوي نورالدین عمیر، کابل کې د ازبېکستان د کرنې وزارت له مرستیال ابدذکروف جمشید او مل پلاوي سره یې لیدنه وکړه.
په دې لیدنه کې، دواړو لورو د کرنې، مالدارۍ، بڼوالۍ، څېړنې، ترویج، د کرنې او وترنرۍ د محصلانو د روزنې او همدارنګه په یادو سکټورونو کې د پانګونې د پراختیا په اړه هر اړخیزې خبرې اترې او د نظرونو تبادله وکړه.
ازبېکستاني پلاوي دکرنې له وزیر سره په لیدنه کې خپل وړاندیزونه په بېلابېلو برخو کې وړاندې کړل او د کابل، ننګرهار، کندهار، فاریاب، جوزجان، بلخ، کندز او تخار ولایتونو کې د غنمو د اصلاح شویو تخمونو د ترویج، جوارو، بڼوالۍ او مالدارۍ په برخو کې د ګډو پروژو د پلي کولو لپاره خپله چمتووالی څرګند کړ.
مولوي عطاءالله عمري په دې ناسته کې د پلاوي هرکلی وکړ، د دواړو هېوادونو ترمنځ یې پر ښو اړیکو خوښي څرګنده کړه او د افغانستان له لوري یې د همکاریو د پراختیا لپاره پر چمتووالي ټینګار وکړ. نوموړي د غواوو، پسونو، وزو او اسونو د فارمونو پر جوړولو، د عصري کرنې پر ترویج، د بزګرانو د نویو لاروچارو سره پر بلدتیا او د غنمو د حاصلاتو پر زیاتوالي ټینګار وکړ.
ورپسې، مولوي نورالدین عمیر له یاد پلاوي سره په جلا لیدنه کې د کرنې، مالدارۍ او اوبولګولو په برخو کې د افغانستان پر اړتیاوو خبرې وکړې او د مالدارۍ فارمونو، کب روزنې، شاتو مچیو روزنې او د څېړنیزو تجربو د شریکولو په برخو کې یې د همکاریو پر دوام ټینګار وکړ.
له بلې خوا، ابدذکروف جمشید د خپل هېواد له لوري د کرنیزو لابراتوارونو د جوړولو، د ۱۰۰ هکتاره بڼونو د احداث، د اصلاح شویو تخمونو (غنم، هندواڼې، خټکي او وریجې) د ترویج او وېش، د کرنې او مالدارۍ د سکتور د کارکوونکو او زده کړیالانو د روزنې، د چرګانو روزنې د پراختیا او د عصري کرنیزو ټکنالوژیو د ترویج لپاره د همکارۍ چمتووالی څرګند کړ.
نوموړي همدارنګه زیاته کړه، چې د پخوا په پرتله د افغانستان د کرنیزو محصولاتو صادرات زیات شوي او د ازبېکستان خلک د دغو محصولاتو د ښه کیفیت او خوند له امله له کارولو سره ځانګړې لېوالتیا لري.
د یادونې وړ ده، چې یاد پلاوی د ازبېکستان د کرنې او مالدارۍ د مرستیال په مشرۍ افغانستان ته راغلی او دواړو لورو د کرنې په برخه کې د ګډو همکاریو د پراختیا پر سر هوکړې ته رسېدلي دي.
