د کرنې وزارت مالي او اداري مرستیال د کندهار یوشمېر بزګرانو سره وکتل

د کندهار یو شمېر بزګرانو د کرنې، اوبو لګولو او مالدارۍ وزارت مالي او اداري مرستیال ملا آغاجان آخند «حاجی سالم» سره په یوه ناسته کې د خپلو ستونزو او غوښتنو په اړه خبرې وکړې. په دې ناسته کې د (۵۰۱۰) مټریک ټنه غنمو پیرلو او د وچکالۍ پر وړاندې د مرستو په اړه هم خبرې وشوې.
یاده غونډه د کندهار د کرنې، اوبو لګولو او مالدارۍ ریاست په تالار کې ترسره شوه، چې پکې د کندهار دکرنې رییس مولوي فضل الباري فضلي، د کابل څخه راغلي پلاوي، او یو شمېر بزګرانو ګډون کړی و. د غونډې په پیل کې د کندهار د کرنې رییس یاد ولایت ته د کرنې وزارت د مالي او اداري مرستیال له سفر څخه مننه وکړه او د اضافي غنمو پیرلو په اړه یې د امیرالمؤمنین حفظه الله حکم تشریح کړ.
د کرنې وزارت مالي او اداري مرستیال ملا آغاجان آخند «حاجی سالم» په خپلو خبرو کې د دې سفر موخه د اضافي غنمو پېرلو ترڅنګ، د کرنې، مالدارۍ او اراضۍ پراختیا لپاره د همکارو سازمانونو سره لیدنې وبللې او د بزګرانو لپاره د شنو خونو، چیکډمونو جوړولو او د وچو شیدو د مخنیوي په برخه کې د همکارۍ ډاډ ورکړ.
د غونډې په پای کې، د ولسوالیو بزګرانو خپلې ستونزې له چارواکو سره شریکې کړې او د مرستو غوښتنه یې وکړه.
د دې ناستې موخه د بزګرانو ملاتړ او د غنمو زېرمه کول و، ترڅو وچکالۍ او نورو طبیعي پېښو پر وړاندې د اړمنو خلکو لاسنیوی وشي.