د کرنې وزارت سرپرست د کوچیانو چارو سمون له رییس سره په کتنه کې: کوچیانو لپاره د ښو چوپړونو د وړاندې کولو زمینې وارزول شوې
۹ تله ۱۳۹۹
د کرنې وزارت سرپرست او نوماند وزیر ډاکټر انوارالحق احدي دخپل کار په دفتر کې د کوچیانو چارو د سمون له رییس استاد حبیبالرحمن سره وکتل.
په دې لیدنه کې د کوچیانو چارو د سمون رییس د کرنې وزارت له سرپرست څخه وغوښت، چې د څړځایونو اړوندو قوانینو او پروژو په پلي کولو کې دې کوچیان هم دخیل شي.
استاد حبیبالرحمن دغه راز دمالدارۍ په برخه کې کوچیانو لپاره د ښو چوپړونو د وړاندې کولو غوښتنه هم وکړه.
ددې خبرو اترو په لړ کې د کرنې وزارت سرپرست ژمنه وکړه، چې هلې ځلې کوي ترڅو د پروژو له لارې د کوچیانو اړتیاوې پوره او د دوی لپاره غوره چوپړونه وړاندې کړي.
باید وویل شي، چې د کرنې وزارت د خلکو په کډون د کرنې او مالدارۍ برنامې «CLAP»له لارې د مالدارۍ په برخه کې په ځانګړ توګه د کوچیانو دمالدارۍ د وضعیت د ښه کولو په پار فعالیت کوي.
