د کرنې وزارت د ځمکو چارو ریاست لخوا په ننګرهار ولایت کې د استرداد شويو ځمکو سروې پيل شو
۳ سلواغه ۱۴۰۲ه.ش
۱۱ رَجَب المُرَجَّب ۱۴۴۵ ه.ق
د کرنې، اوبو لګولو او مالدارۍ وزارت د ځمکو چارو ریاست د غير رسمي ښاري سيمو د ثبت رياست لخوا کابل ولایت څخه وروسته ننګرهار دویم ولایت دی چې د امارتي ځمکو د سروې چارې پکې پیل شوې.
یاده ځمکه چې د ننګرهار ولایت د هسکې مينې او کوټ ولسوالېيو تر منځ په دوه قطعو کې پرته ده چې ټوليزه کچه يې ۸۷ زره جريبه اټکل شوې چې د غصب شویو ځمکو د مخنيوي کمیسیون له لورې استرداد شوې ده.
د استرداد شويو ځمکو د سروې او د دغه کار د ښه همغږۍ په موخه د اراضۍ ریاست د غير رسمي ښاري سيمو د ثبت رییس مولوي عبدالصمد پاڅون او مل پلاوی يې ننګرهار ولایت ته ولاړل.
د اراضۍ ریاست د غير رسمي ښاري سيمو د ثبت رییس ننګرهار ولایت ته په رسېدو د د ننګرهار ولایت د کرنې رییس مولوي عبدالستار محمد او د دغه څانګې کارکونکو په ګډه سره نوموړي سیمې ته تللي او د يادې ځمکې د سروې چارې پیل کړې.
د یادونې وړ ده چې د اراضۍ ریاست د غير رسمي ښاري سيمو د ثبت رياست مسوولينو د هسکې مېنې او کوټ ولسوالېيو له ديني عالمانو، قومي مشران او د کلي يو شمېر مخورو سره د دغو ځمکو د سروې او د دغه ملي پروژې د ارزښت په اړه هم خبرې کړي دي.
په پای کې د ننګرهار ولایت د یادو ولسوالیو اوسېدونکو د افغانستان د اسلامي امارت د دغه ملي پروژې ستاينه وکړه او د کرنې، اوبو لګولو او مالدارۍ وزارت د اراضۍ ریاست له مسوولينو سره يې د هر راز همکارۍ ژمنه هم وکړه.
