د کرنې وزارت د اراضۍ په لوی ریاست کې د کارکوونکو د کاري وړتیا لوړولو په پار څلور ورځنی روزنیز ورکشاپ دایر شو 

۶غبرګولی ۱۴۰۴ ه‍.ش
۲۹ ذُوٱلْقَعْدَةِ ۱۴۴۶ه‍.ق
د کرنې، اوبولګولو او مالدارۍ وزارت د  اراضۍ لوی ریاست مسؤلیو لخوا د ( کابل، لغمان، کونړ، نورستان، ننګرهار، دايکندي، فارياب، جوزجان، پروان، خوست، پکتیا، پکتیکا، بدخشان، تخار، کندز، بغلان، بلخ، سمنګان، باميان، غور، پنجشېر، سرپل او کاپيسا ) ولایتونو کارکوونکو ته د تصفیې، استملاک، سروې کدستر، د ځمکو انتقال او تبادله، د ځمکو معلوماتي سیستم او ځمکو بانک او د ځمکو اجارې  په برخه کې څلور ورځنی روزنیز ورکشاپ د اراضۍ په عمومي رياست کې دایر شو.

په دې ورکشاپ کې د کرنې، اوبولګولو او مالدارۍ وزارت د اراضۍ لوی رییس مولوي محمود مظلوم، د اراضۍ ادارې د ځمکو د اجارې عمومي رییس ملا عبدالظاهر امين او د دغه ادارې د ټولو برخو رییسان، آمرین او همدارنګه د يادو ولايتونو د ځمکوالۍ په برخه کې آمرين او عمومي مدیرانو هم برخه اخیستې وه.
په پیل کې د کرنې وزارت د اراضۍ لوی رییس مولوي محمود مظلوم له ولايتونو څخه راغلي آمرینو او کارکوونکو ته ښه راغلاست ووایه ویې ویل: «د خوښۍ ځای دی، چې له کلونو راهيسي په هېواد کې په بشپړه توګه امنيت تامين دی او ټول هېوادوال کولای شي چې په پوره ډاډ سره خپلې ورځنۍ چارې پرمخ يوسي. نو ستاسو مسوولیت دی، چې له دغه ډاډمن امنیت څخه استفاده وکړی او دغه ورکشاپ ته چې له لرې ولايتونو څخه راغلي ياست په پوره توګه متوجه او ګټه ترې پورته کړئ» 
نوموړي همداراز د دغه پروګرام په ارزښت او د ځمکوالۍ په برخه کې د کارمندانو د علمي کچې د لوړولو په پار يې هم خبرې وکړې.
ښاغلي مظلوم زیاته کړه: «له کلونو راهيسي په هېواد کې چې څومره ستونزې دي اکثريت يې د ځمکو پر سر دي نو دا ستاسو دنده ده چې دغو ستونزو ته د حل لاره پیدا او هغه ته د پای ټکی کېږدی».
نوموړي له ټولو ولايتي او مرکزي کارمندانو څخه وغوښتل، چې هېڅ کله هم له خپل ورسپارل شوي مسوولیت څخه ناوړه استفاده ونکړي او په خپلو دندو کې له پوره اخلاص او صداقت څخه کار واخلي.
د اراضۍ لوی رییس وویل: «نن چې کومه دنده موږ او تاسو ته راکړ شوی هغه امتیاز نه بلکې مسووليت دی، چې بايد په سمه توګه هغه ته متوجه شو او خپل مسووليت په ډېر اخلاص او صداقت سره پر مخ يوسو.»  نوموړي له ټولو آمرینو څخه وغوښتل، چې خپلې ستونزې او وړانديزونه دې په رسمي بڼه د اراضۍ ادارې مقام سره شریک کړي.
په پای کې د اراضۍ ادارې د سروې کدستر رییس مولوي محمد نبي عالمګيري هم په خپل وار خبرې وکړې او ټولو کارمندانو ته وويل: « تاسې د خپل ولایت په استازيتوب دلته راغلي یاست نو که له تاسو څخه خدای مکړه کومه تېروتنه کېږي د ټول ولايت او همدارنګه د ټولې اراضۍ د مسؤلینو او کارمندانو نوم درسره بدېږي او که تاسې خپل مسووليت په پوره ايماندارۍ پر مخ یوسی نو دا به د ټولې ادارې په ځانګړې توګه د مربوطه وزارت په نېک نامی تمام شي.»
نوموړي له ټولو کارکوونکو څخه وغوښتل، چې کومې زدکړې دلته تاسو ته د ښوونکو او مسؤلینو لخوا تدريس کېږي هغه په خپلو ولايتونو کې نورو کارمندانو ته هم ور زده کړی ترڅو د ځمکو په برخه کې چې کومې ستونزې شته هغه لرې او ټول خپلو دندو ته په پوره توګه متوجه شي.