د کرنې او مالدارۍ مرستیال په خوست کې د ګرمو اوبو د کبانو له فارم څخه لیدنه وکړه
۲۳ تله ۱۴۰۴ هـ.ش
۲۲ رَبِیعُ الْثاني ۱۴۴۷ هـ.ق
د کرنې، اوبولګولو او مالدارۍ وزارت د کرنې او مالدارۍ مرستیال مولوي صدراعظم عثماني، خوست ولایت ته د خپل کاري سفر په ترڅ کې، د دې ولايت د باغ شمل په سيمه کې د ګرمو اوبو کبانو له نوي جوړ شوی فارم څخه ليدنه وکړه.
ياد فارم د کرنې، اوبولګولو او مالدارۍ وزارت لهخوا په ۱۲ جريبه ځمکه کې جوړه شوې، چې د يو ميليون کبانو د بچيو د روزنې او په کال کې د ۱۰ ټنه کبانو د غوښې د توليد ظرفيت لري.
دا فارم څلور نیمجریبه خاورین حوضونه، د هچري یوه خونه، اتهخونیز اداري تعمیر، دوه سمنټي حوضونه چې د ۳۰۰ او ۱۵۰ متره مربع په اندازه دي، د اوبو رسولو کانال، د اوبو زېرمه او ژوره څاه لري.
د فارم ټول لګښت شاوخوا ۱۷ میلیونه افغانۍ اټکل شوی، چې د ودانیو په جوړولو، اړینو تجهیزاتو په نصب او پېرلو، د کبانو د بچیو، مورني کبانو او د هغوی د خوراک په برابرولو لګول شوی دی او ټاکل شوې ده، چې یاد فارم ډېر ژر خپل فعالیت پیل کړي.
مولوي صدراعظم عثماني د ليدنې پر مهال وويل، چې د دې فارم جوړول د کبانو د توليد د پراختيا، د اوبو د ودې او د کاري فرصتونو د رامنځته کولو په لور يو مهم ګام دی. نوموړي زياته کړه، چې وزارت هڅه کوي ورته پروژې په نورو ولايتونو کې هم پلې کړي.
د دغه فارم د جوړولو بودیجه د کرنې وزارت د الوتونکو او اقتصادي حشراتو د ترویج ریاست د پراختیایي پروژې له لارې تأمینه شوې ده. د دغو پروژو د پلي کولو موخه د کورنيو توليداتو لوړول، د کبانو د پروسس او تکثير په برخه کې ځانبسياينه، او خلکو ته د دايمي اقتصادي فرصتونو رامنځته کول دي.
