د پیاز او کچالو زېرمتونونو او ممیزخونو د څلور زره او ۵۰۸ ودانیو رغنیزې چارې پیل شوې.

۳۰ غویی ۱۴۰۰
د کرنې، اوبولګولو او مالدارۍ وزارت، له خوا د «کرنې په اوونۍ» کې د هېواد په ۳۴ ولایتونو کې د پیاز او کچالو لپاره د صفرانرژۍ زېرمتونونو او ممیزخونو د څلورو زره او ۵۰۸ ودانیو رغنیزې چارې او دغه راز د مېوو او سبو د لمریزو وچوونکو دستګاوو دوېش چارې پیل شوې.
دکرنې وزارت د اطلاعاتو رییس او ویاند اکبر رستمي وایي، چې دغه نوي ودانۍ دکرنې وزارت له بودیجې څخه د یو میلیارډه او ۳۸۳ میلیونه افغانیو په لګښت د کرنیزو محصولاتو مدیریت د پروژې له لارې په ټول هېواد کې پلي کېږي.
ښاغلی رستمي زیاته کړه، چې ددغو زېرمتونونو او د تازه کرنیزو محصولاتو د وچوونکو لمریزو دستګاوو ۶۰ سلنه لګښت د کرنې وزارت او ۴۰ سلنه لګښت یې ددې پروژې د برخمنو کسانو له خوا ورکول کېږي.
د کرنې، اوبولګولو او مالدارۍ وزارت د اطلاعاتو رییس او ویاند وویل، چې د پیاز او کچالو د صفرانرژۍ زېرمتونونو او ممیزخونو او د تازه مېوو او سبو د وچوونکو دستګاوو د وېش موخه مدیریت، د واراتو ټیټوالی، د صادراتو زیاتوالی او د کرنیزو محصولاتو غوره پروسس دي.
اکبر رستمي وایي، چې د یادو نویو ودانیو جوړول ددې لامل کېږي، چې د وارداتو کچه ټیټ او د صادراتو کچه لوړ شي او دغه راز د ضافي کرنیزو محصولاتو د خوساکېدو مخه ونیسي.