د پکتیکا ولایت اورګون ولسوالی کې د نیالګیو کښېنولو اشر پیل شو
۲۷ کب ۱۴۰۳ه.ش
۱۷ رَمَضانُ المُبارَک ۱۴۴۶ه.ق
د پکتیکا ولایت اورګون ولسوالۍ کې د نیالګیو کښېنولو د عامه اشر پرانیستغونډه وشوه، چې پکې د کرنې رییس محمد زمان عمري، د ولسوالۍ مسؤلینو، قومي مشرانو، علماوو، سپینږیرو او ځوانانو ګډون کړی و.
د کرنې رییس محمد زمان عمري د غونډې ګډونوالو ته د ښه راغلاست ترڅنګ د نیالګیو کښېنولو پر ارزښت، شرعي او ټولنیزو ګټو مفصلې خبرې وکړې. نوموړي وویل چې اسلامي امارت د هېواد د زرغونتیا او ښېرازۍ لپاره جدي اقدامات کوي او له خلکو یې وغوښتل چې د کښېنول شوو نیالګیو پالنه او ساتنه وکړي، څو دا هڅې مطلوبه پایلې ورکړي.
نوموړي زیاته کړه چې اسلامي امارت د ولسونو خدمت ته ژمن دی، او که خلک ستونزې ولري، باید له امارتي مسؤلینو سره یې شریکې کړي، ترڅو پر وخت ورته رسېدنه وشي.
د غونډې په پای کې ګډونوالو نیالګي کښېنول، چې په دې توګه د نیالګیو کښېنولو عامه اشر رسماً پیل شو.
