د پکتیکا زیړوک ولسوالۍ کې ۳۰۰ مالدارانو ته د لبنیاتو لوښې ووېشل شول
د پکتیکا ولایت د زیړوک ولسوالۍ د کرنې مدیریت په همکارۍ، د کليو بیارغونې ادارې آر آر اې اې لهخوا ۳۰۰ مالدارانو ته د لبنیاتو لوښي ووېشل شول.
یاد لوښي، چې ۱۳ قلمه مختلف توکي پکې شامل وو، د یوې له وړاندې ترسره شوې سروې له مخې مستحقو مالدارانو ته ورکړل شول. دغه مرستې د مالدارۍ د ودې او د لبنیاتو د پروسس ظرفیت د لوړولو په موخه ترسره کېږي.
همداراز، د وېش تر څنګ، مستفیدینو ته د یادو وسایلو د سم استعمال په اړه عملي روزنه هم ورکړل شوه، څو دوی وکولای شي له ورکړل شویو امکاناتو څخه اغېزمنه ګټه پورته کړي.
د کرنې مدیریت مسؤولین وایي، چې دا ډول پروګرامونه د مالدارانو د عوایدو د زیاتوالي او د لبنیاتو د محصولاتو د معیاري کولو لپاره مهم ګامونه دي.
