د هډې فارم عمومي سړک پر غاړه د خرما بوټو د کرنې لړۍ پیل شوه
۶ غویی ۱۴۰۴ ه.ش
۲۸ شَوّالُ المُکَرَّم ۱۴۴۶ه.ق
د هډې فارم د زرغونتیا او ښکلا په موخه، د کلوب، رستورانت او عمومي سړک پر غاړه د ۵۵ خرما بوټو د کرنې چارې پیل شوې، چې ټاکل شوې دا لړۍ به په یوه ورځ کې بشپړه شي.
یاد بوټي له هغه خرما بڼ څخه انتقال شوي، چې نږدې ۱۵ کاله وړاندې جوړ شوي و، خو د جوړېدو پر مهال پکې د بوټو تر منځ معیاري فاصله نه وه رعایت شوې.
د یادو بوټو لېږد یوازې عمومي سړک نه ښکلی او زرغون کوي، بلکې د هډې فارم پر ۴۰ جریبه ځمکه جوړ شوي ۲زره او ۷۰۰ بوټو لرونکي خرما بڼ تنظیم او د حاصلاتو لوړولو کې هم مرسته کوي.
په دې کرنیزه لړۍ کې د ننګرهار وادي کرنیز شرکت اجرائیوي رئیس سید محمد نعیم محمدي، د کرنیزو او تخنیکي چارو رئیس انجنیر حکمت الله معروف، د هډې فارم آمر قاري بشیر احمد مومن او ځینو نورو تخنیکي او اداري مسؤلینو ګډون کړی و.
د یادونې وړه ده، چې دا مهال د هډې فارم په دویم بلاک کې، ۶۵ جریبه ځمکه کې د خرما دوه بڼونه دي، چې هر کال پرېمانه حاصل کوي او پلور ته وړاندې کېږي. د هډې فارم آمر، قاري بشیر احمد مومن وایي، چې په راتلونکې اونۍ کې به د لس جریبه نوې ځمکې په برابرولو سره یو نوی خرما بڼ هم جوړ شي، چې پکې به شاوخوا ۴۰۰ نوي خرما بوټي کښېنول شي.
