د هلمند مرکز لښکرګاه کې د لبنياتو پلورونکو هټیو څخه څارنه وشوه
۱۳ غویی ۱۴۰۴ ه.ش
۵ ذُو ٱلْقَعْدَةِ ۱۴۴۶ه.ق
د هلمند ولایت د کرنې، اوبو لګولو او مالدارۍ ریاست اړوند د مالدارۍ او د حیواني روغتیا امریت کارکوونکو دلښکرګاه په مرکزي سیمو کې د لبنياتو د پلورونکو له فعالیتونو څخه لیدنه، کنترول او نظارت ترسره کړه.
دغه څارنه د دې لپاره ترسره شو، څو ډاډ ترلاسه شي چې لبني محصولات ښاريانو ته په پاک، صحي او معیاري ډول عرضه کېږي. د نظارت پر مهال د لبني محصولاتو کیفیت له نږدې وڅارل شو او د خرڅلاو پر ځایونو کتنه وشوه.
مسؤلینو څرګنده کړه، که چیرې کوم پلورونکی تر وخت تېر، فاسد یا بېکیفیته لبنيات خرڅوي، قانوني چلند به ورسره وشي او د اړوندو اصولو له مخې به مجازات شي.
د کنترول او څارنې پر مهال د لبنياتو پلورونکو ته لازمې روغتیایي لارښوونې هم ورکړل شوې، څو د محصولاتو د کیفیت په ساتنه کې لا زیات پام وکړي.
د هلمند د کرنې، اوبو لګولو او مالدارۍ ریاست هڅه کوي چې، دا ډول نظارتي بهیرونه دوام ولري، څو هلمندوال د روغتیا له پلوه خوندي لبني محصولات وکاروي.
