د هلمند مارجې ولسوالۍ کې نږدې ۲زره کوچنیو څارویو ته د پي پي آر ناروغۍ ضد واکسین تطبیق شو
۳ غویی ۱۴۰۴ ه.ش
۲۵ شَوّالُ المُکَرَّم ۱۴۴۶ه.ق
د هلمند ولایت د کرنې، اوبولګولو او مالدارۍ ریاست له لوري، د مارجې ولسوالۍ په بېلابېلو سیمو کې نږدې ۲زره کوچنیو څارویو ته د پي پي آر ناروغۍ ضد واکسین تطبیق شو.
یاد کمپاین د څارویو د خوندیتوب، د مالدارانو د اقتصادي زیانونو د مخنیوي او د یادې وژونکې ساري ناروغۍ د خپرېدو د کنټرول په موخه ترسره شو. واکسینشوي څاروي عمدتاً وزې، پسونه او مېږې وې، چې د سیمې د مالدارانو د عاید اصلي سرچینه جوړوي.
د کرنې ریاست مسؤلین وایي چې د دغه واکسین تطبیق به د پي پي آر ناروغۍ د خپرېدو مخه ونیسي، پي پي آر هغه ناروغي ده، چې کولی شي کوچني څاروي له منځه یوسي او د مالدارانو اقتصاد اغېزمن کړي.
سیمه ییزو مالدارانو د دې اقدام هرکلی کړی او د خپلو څارویو د ساتنې په برخه کې یې د کرنې ریاست له مسؤلینو مننه کړې ده.
د یادونې وړ ده، چې د څارویو ورته واکسینونو کمپاینونه به د هلمند ولایت په نورو ولسوالیو کې هم دوام ومومي.
