د هلمند لښکرګاه او ګرشک کې د طبیعي کبانو غیرقانوني نیولو په تور څلور هټۍ وتړل شوې
۹ تله ۱۴۰۳ه.ش
۲۷ رَبِیعُ الْأَوَّل ۱۴۴۶ه.ق
د هلمند ولایت د کرنې، اوبولګولو او مالدارۍ ریاست د مالدارۍ او حیواني روغتیا آمر حافظ هدایت الله هدایت او نورو مسلکي کارکوونکو، په لښکرګاه او ګرشک کې د کبانو د پخلي هټیو څارنه وکړه.
د څارنې پر مهال په ګرشک ولسوالۍ کې درې او په مرکز لښکرګاه کې یوه هټۍ وتړل شوه، ځکه چې هټیوالو د کرنې ریاست د مکررو عامه پوهاویو سربېره، د عمومي سیند کبان په زهري موادو، چنګک او د برېښنا شارټۍ په وسیله نیولي وو.
ټولو هټیوالو ته جدي سپارښتنه وشوه، چې یوازې د فارمي کبانو پلور ته دوام ورکړي او له عمومي سیندونو، زابرانو او کانالونو څخه د طبیعي کبانو له نیولو ډډه وکړي. هغه کسان چې دا عمل تکرار کړي، هټۍ به یې وتړل شي او عدلي او قضایي ادارو ته به ور وپېژندل شي.
څو میاشتې مخکې د هلمند ولایت کرنې رییس الحاج مولوي نیازمحمد وهاج د هلو ځلو په نتیجه کې، نږدې ۳۰ زره چوزه کبان په عمومي او فرعي کانالونو کې د کبانو د نسل ژغورلو لپاره خوشې شول. دا کبان به په طبیعي ډول په کانالونو کې وده وکړي، چې د کبانو په نسل کې به زیاتوالی راولي.
