د هلمند دکرنې رییس د یوناما دفتر د سهیل لویدیځ زون چارواکو سره وکتل
۲۱ زمری ۱۴۰۴ هـ.ش
۱۸ صَفَر المُظَفَّر ۱۴۴۷ هـ.ق
د هلمند ولایت د کرنې، اوبولګولو او مالدارۍ رییس مولوي نیازمحمد وهاج د خپل کار په دفتر کې په افغانستان کې د ملګرو ملتونو د سیاسي استازولۍ(یوناما) دفتر سهیل لویدیځ زون سرپرست رییس او د سیاسي څانګې مشر البرټو، د سیاسي برخې افسر سید عبدالله اغا او د پلان او برنامو د همغږۍ مدیر قاري شفیق الله مبین سره ګډون ناسته وکړه.
په پیل کې د هلمند دکرنې رییس راغلي پلاوي ته ښه راغلاست ووایه او د هغوی د هغو فعالیتونو ستاینه یې وکړه، چې د کرنې ریاست په برخه کې یې تر سره کړي دي.
د هلمند دکرنې رییس په خپلو خبرو کې وویل، چې د اسلامي امارت د رهبرۍ په امر په هلمند کې د کوکنارو کښت او کاروبار په بشپړ ډول بند شوی دی او اوس نړۍوالې مرستندویه ادارې باید د امارت د اصولو او قوانینو په رڼا کې له بزګرانو سره صادقانه او مخلصانه مرستې وکړي. هغه د هلمند پراخه اراضي د هر ډول نباتاتو لپاره مناسبه وبلله او زیاته یې کړه، چې د مرستندویه ادارو لپاره دلته د پراختیایي پروژو پوره زمینه برابره ده.
نوموړي د دې ولایت لپاره د ځینو مهمو او بنسټیزو پروژو وړاندیز وکړ چې پکې د مالدارۍ په برخه کې پانګونه، د کرنې د لویو پروژو تمویل، د طبیعي سرچینو پیاوړتیا، د نوو او ارزښتمنو نیالګیو روزنه، د سړوخونو رغونه او د اوبو مهارولو پروګرامونه پکې شامل دي.
ښاغلي البرټو د ناستې پر مهال د هلمند کرنیز اقتصاد د ودې او د نیشه یي توکو پر وړاندې د بدیلو کښتونو د تمویل په برخه کې د همکارۍ ډاډ ورکړ. هغه زیاته کړه، چې غواړي د خصوصي سکتور سره د مالي او تخنیکي مرستو ترڅنګ د کرنیزو سوداګریزو چارو لپاره د ویزو په برخه کې اسانتیاوې، د کار زمینه برابرول، بانکي سهولتونه، د بهرنیو تعرفو او مالیاتو کمښت او د اوبو ستونزو ته د رسېدو پر وړاندې د حل لارو چارو په برخه کې کار وکړي.
په پای کې د هلمند دکرنې رییس له یوناما وغوښتل، چې نړۍوالې مرستندویه ادارې دې وهڅوي څو په هلمند کې بنسټیز کارونه ترسره کړي، او ډاډ یې ورکړ چې د اسلامي امارت مسؤلین به د دغو پروژو په پلي کولو کې بشپړه همکاري وکړي.
