د هلمند بولان څېړنیز فارم کې زده کړیالانو ته د عملي زده کړې زمینه برابره شوې
۱۹ سلواغه ۱۴۰۲ه.ش
۲۷ رَجَب المُرَجَّب ۱۴۴۵ ه.ق
د هلمند ولایت د کرنې، اوبو لګولو او مالدارۍ ریاست اړوند د بولان څېړنیز فارم کې د کرنې پوهنځۍ زده کړیالانو ته په عملي او نظري ډول د زده کړې زمینه برابره شوې ده.
د هلمند د کرنې ریاست چارواکي وايي، چې ددې ولایت د کرنې پوهنځۍ زده کړیالانو ددې ولایت د بولان څېړنیز فارم څخه وخت ناوخت لیدنه کوي، چې ددغو لیدنو په ترڅ کې د هلمند دکرنې پوهنځۍ د بڼوالۍ څانګې زده کړیالانو په داسې حال کې چې د یادې څانګې استادان پوهنمل شمس الدین وفا، پوهنیار حکمت الله ځلاند او پوهنیار ایمل ناهز یې ملتیا کول، د فنګسي ناروغیو څخه د ګڼو ونو د ساتلو په موخه عملي کار ترسره کړل.
د نوموړي فارم د مسؤلینو او استادانو له لوري زده کړیالانو ته د فنګسي ناروغیو څخه د ونو د ساتلو په موخه د لایم سلفر جوړولو، د انګورو او د نورو مېوه لرونکو ونو د ښاخ برۍ په اړه عملي او نظري معلومات وړاندې شول.
د یاد پوهنتون محصلینو د کرنې ریاست د رهبرۍ څخه مننه وکړه او زیاته یې کړه، دا چې د کرنې ریاست د مسلکي کارمندانو لخوا ورته د کرنې په برخه کې هر اړخیز معلومات په عملي او نظري ډول ښودل کېږي، دغه چارې د محصلینو په وړتیا کې د پام وړ بهبود او نوښت راولي .
دیادولو وړ ده چې د بولان څېړنیز فارم د هیواد په کچه د کرنیزو عملي زدکړو لپاره ښه مرکز ګڼل کېږي چې هر کال په بېلابېلو فصلونو کې د هلمند پوهنتون د کرنې پوهنځۍ، او د کرنې ا وترنرۍ انستیتوت محصلینو ته د یاد فارم د متخصصینو لخوا په عملي ډول زدکړې ورکول کېږي.
