د ننګرهار کانال شرکت د ترکاڼۍ فابریکې چارې او امکانات پراخېږي
۱۷ مرغومې ۱۴۰۲ه.ش
۲۵ جُمَادَى الثاني ۱۴۴۵ ه.ق
د ننګرهار کانال شرکت رییس مولوی غلا الرحمن کظیم وایي، چې د ننګرهار کانال شرکت اړوند ترکاڼۍ فابریکه کې د جوړېدونکو اجناسو مینه وال ډېر شوي دي او بازار یې هم تود دی، په همدې موخه ددې فابرېکې اړتیاوې او امکانات پراخېږې او ستونزې یې هم هوارېږي.
ښاغلی کظیم وویل، چې د ننګرهار کانال شرکت د ترکاڼۍ فابیکې جوړېدونکو توکو د پېر-پلور په پار د جلال آباد په ښار کې د پلور څانګه جوړېږي، چې په کې د دې شرکت د ترکاڼۍ فابریکې اړونده توکي لکه میز، چوکۍ، کوچونه، کوټ بندونه، المارۍ او نورو توکو د پلور ترڅنګ د هېوادوالو فرمایشات هم منل کېږي.
د ننګرهار کانال شرکت د رییس په خبره په دې فابرېکه کې ټول کارېدونکي لرګي خپله د کانال د څلورګونو فارمونو څخه دي، چې له ښه مرغه جوړ فرنیچرو او اجناسو يې د بهرنیو هغو ځای نیولی دي.
د ننګرهار کانال شرکت د ساختمان امریت اړوند د نجارئ فابريکه هډې فارم کې موقعیت لري، په وروستي ځل ۱۷۰زره افغانيو په مالي لګښت رغول شوې ده.
باید وویل شي، چې د ترکاڼۍ یاده فابرېکه د لومړي ځل لپاره په ۱۳۳۹ کال کې هډې فارم اړوند ثمرخېلو سیمه کې جوړه او فعاله شوه، چې هغه مهال په کې ۱۸۰۰ تنه درې وخته په کار بوخت و، د ننګرهار کانال شرکت د اړتیاو سره سره يې د ننګرهارولایت د دولتي ادارو او استوګنو غوښتنې هم پوره کول.
