د ننګرهار کانال رياست روغتيايي کلينيک هېوادوالو ته هره ورځ په ښه او منظم ډول روغتیایي چوپړتیاوې وړاندې کوي
۳ لړم ۱۴۰۱ه.ش
۲۹ ربیعالاول ۱۴۴۴ ه.ق
د ننګرهار کانال ریاست چارواکي وایي، چې د هډې فارم په روغتیايي کلینیک کې اوس مهال د نسايي ولادي، واکسین، داخله، لابراتوار، تبرکلوز، کرونا، مور او ماشوم، غاښونو، جراحي او نورو برخو کې د پنځه تنه ښځینه ډاکترانو او ۶ تنو نارینه ډاکترانو په واسطه هېوادوالو ته خدمات وړاندې کېږي.
ددغې روغتیايي کلینک مسوول ډاکتر سید انور سادات وايي: «د ننګرهارکانال د رییس مولوي غلام الرحمن کظیم په ځانګړې پاملرنې اوس ددغه روغتیايي کلینک کارونه لا منظم او چټک شوي، او د مراجعینو راتګ یاد روغتیايي کلینک ته زیات شوي.»
د یادونې ده چې د یاد روغتیايي کلینک د کارونو د لا منظمولو او ښه کولو په موخه د ډاکترانو سره تل غونډې ترسره کېږي.
