د ننګرهار پچیراګام کې پر لسګونو کروندګرو مرستې ووېشل شوې
۶ زمری ۱۴۰۳ه.ش
۲۱ مُحَرَّمُ الحَرام ۱۴۴۶ه.ق
د ننګرهار د کرنې، اوبولګولو او مالدارۍ ریاست سره په همغږۍ د ډاکار خیریه مؤسسې له لورې ۵۶ تنو ته د بڼوالۍ، سبو او کورنیو باغچو کرنیزو وسایلو کڅوړې ووېشل شوې.
د ننګرهار دکرنې ریاست د کرنیزو خدمتونو امر مفتي عزیز الرحمن عزیز وویل، چې د ډاکار مؤسسې له لورې ۵۶ بزګرانو د پچیراګام ولسوالی په پاس صبر، لاندې صبر او زمرخېلو کلیو کې د بڼوالۍ، سبو او کورنیو باغچو کڅوړې ورکړل شوي.
ښاغلي عزیز وویل د بڼوالۍ په کڅوړه کې د درملو شیندلو پمپ، څانګو پریکولو غټه قیچي، وړه قیچي، آره، بېلچه، تسکوره، زېنه او هیومیک اسید شامل دي.
د کورنیو باغچو او سبو کرونکو ته درملو شېندلو پمپ، ماسک، عینکې، دستکشي، لاسي کراچۍ، رمبې، چپه رمبې، تسکوره، ښاخۍ، بېلچه او د حاصلاتو راټولولو پچۍ ووېشل شوي.
د ډاګار مؤسسې سیمه دفتر مسؤل انجنیر جواد رفیقي وویل،چې د یادو کڅوړو د وېش موخه د بڼوالۍ ترویج، بڼوالو او بزګرانو اقتصادي پیاوړتیا ده.
رفیقي زیاته کړه په پچیراګام ولسوالی کې ۵۶ تنو ته د بڼوالۍ سبو کرکېلي او د کورنیو باغچو په برخه کې روزنه هم ورکړل شوې ده.
