د ننګرهار وادي کرنیز شرکت کې د مشارکتي نارنج بڼ د مېوې خرڅلاو شفافه مزایده ترسره شوه
۴ مرغومې ۱۴۰۴هـ.ش
۴ رَجَب المُرَجَّب ۱۴۴۷هـ.ق
د ننګرهار وادي کرنیز شرکت اړوند د دویم فارم د دویم بلاک مشارکتي ۶۰ جریبه نارنج بڼ د سردرختي مېوې د خرڅلاو ازاده، رڼه او شفافه د مزایدې بهیر پرون د سوداګرۍ او بازارموندنې ریاست د خرڅلاو امریت په دفتر کې ترسره شو، چې په پایله کې یې خلیل احمد حسنزی کرنیز خصوصي شرکت دغه بڼ د ۵ میلیونه او ۴ سوه زره افغانیو په بدل کې ترلاسه کړ.
یاده مزایده د قانوني اصولو او شفافیت د ټینګښت په موخه په علني ډول ترسره شوه، چې شاوخوا شپږو تنو داوطلبانو پکې ګډون کړی و. د مزایدې بهیر د خرڅلاو سرپرست آمر، د ساختمان آمر، د تدارکاتو لوی مدیر، د فروشاتو لوی مدیر او د اړوندو مسوولینو په حضور کې ترسره شو، تر څو د شفافیت، قانونیت او باور فضا لا پیاوړې شي.
د ننګرهار وادي کرنیز شرکت مسوولینو وویل، چې د دې ډول ازادو او شفافو مزایدو ترسره کول د عوایدو د لوړولو، د خصوصي سکتور د ونډې زیاتولو او د کرنیزو شتمنیو د اغېزمن مدیریت لپاره مهم رول لري.
