د ننګرهار لعلپوري ولسوالی کې د اوبولګولو د یوې پروژې چارې پیل شوې
۱۹ وږي ۱۴۰۲ه.ش
۲۴ صَفَرُ المُظَفَّر ۱۴۴۵ه.ق
د ننګرهار د کرنې، اوبولګولو او مالدارۍ ریاست د ملګرو ملتونو پراختیایي ادارې په مالي او د د کلیوالي پراختیا پروژې په تخنکي همکارۍ ددې ولایت د لعلپوري په ولسوالۍ کې د اوبولګولو د یوې پروژې رغنیزې چارې پیل کړي دي.
د ننګرهار دکرنې، اوبولګولو او مالدارۍ رییس مولوی عبدالستار محمد وویل، چې د لعلپوري په ولسوالی کې د ۷۳ زره او ۴۰۰ ډالرو په ارزښت د دیو کانال او سربند د جوړیدو چارې پیل شوي؛ چې په کې ۲۰۵ متره اوږدوالې لري، پر ۱۷۰ مترو سلبونه، ۱۷۰ مترو سوپر پسیج، دوه د اوبو د کنټرول دروازې، ۱۰۰ متره د غاړو دېوالونه او ۱۷۰ متره کټپ وال او ۶۰۰ مترو پاک کارې په کې شامل دي.
د ننګرهار دکرنې رییس وویل، چې ددې پروژې په بشپړېدو سره به ۱۵۰۰ جریبه کرنیزه ځمکه خړوبه او زرګونو خلکوته به د کار زمینه هم برابره شي.
د مولوی عبدالستار محمد په خبره ددې پروژې په رغینزو چارو کې هره ورځ له ۳۰ تر ۴۰ تنو پوری فني او غیر فني کاریګر کارکوی، چې د ۳ میاشتو په موده کې به یې چارې بشپړ او ګټې اخیستنې ته به وسپارل شي.
په همدې حال کې د سیمې اوسیدونکو د یاد کانال په جوړیدو خوښي وښوده او دننګرهارد کرنې، اوبولګولو او مالدارۍ ریاست او پروژی له مسولینو څخه مننه وکړه.
باید وویل شي، چې دکلیوالي پراختیا پروژه د کوکنارو یوه بدیله پروژه ده، چې دکانالونو جوړولو ترڅنګ د بڼوالۍ، شنوخونو جوړولو، کرنیزو وسایلو او ګڼو نورو برخو کې د بزګرانو لاسنېوي کوي.
