د ننګرهار د کانال شرکت: هډې فارم کې ۷۰ نرسریانې فعالې دي

د ننګرهار د کانال شرکت چارواکي وایي، چې ددې شرکت اړوند هډې فارم ک د ۳۰ میلیونه افغانیو په لګښت ۷۰ نرسریانې فعالې دي، چې يادې نرسريانې د سپرلي په راتګ خپل مېوه لرونکي، غېر مېوه لرونکي، موسمي، غېرې موسمي، زينتي او غېر زينتي بوټي، چمن،رنګارنګ ګلان او نور د هېوادوالو خدمت ته په ټیټه بیه وړاندې کوي.
د ننګرهار کانال شرکت رییس مولوي غلام الرحمن کظيم وويل:  «روغ ، سالم چاپېريال او اقليم د انساني ژوند اړينه اړتيا ده، سالم اقليم د بوټو او شين والي له برکته منځته راځي، بل پلو د بوټو کينول ستر کار دی له دی هم اړين کار د بوټو سالم او روغ ساتل دي، پالنه، روزنه يې پکار ده، هېوادوالو ته لازمه ده چې کينول شویو بوټو سمه ساتنه او پالنه وکړي.
نوموړي پر ټولو هېوادوالو غږ وکړ چې پخپلو کورونو، دېرو، حجرو او شاوخوا کې بوټي وکري او خپل راتلونکي نسل ته زرغون، او شين افغانستان په سوغات کې پرېږدي.
دا په داسې حال کې ده، چې ننګرهار کانال شرکت تېره ورځ په ۳ فارم کې په سل جريبه ځمکه باندې ۶۶۰۰ مالټو نیالګیو د کينولو لړۍ پیل کړی دی.