د مخابراتي انتنونو د ځمکو د تثبیت لپاره د بودیجې تخصیص
د هېواد په کچه د مخابراتي انتنونو د ځمکو د تثبیت او پېژندلو په موخه، د ا.ا.ا عاليقدر امیرالمؤمنین حفظهالله اته میلیونه افغانۍ بودیجه ځانګړې کړې ده، څو له مرکز څخه یو پلاوی واستول شي او د یادو ځمکو د ملکیت وضعیت وڅېړي چې دولتي دي که شخصي.
په همدې تړاو، او د دې پروګرام د اغېزمن تنظیم او پلي کولو په موخه، د کرنې، اوبو لګولو او مالدارۍ وزارت د مالي او اداري مرستیالۍ په دفتر کې غونډه دایره شوه. په دې غونډه کې چې د مالي او حسابي رییس مولوي ضیاءالدین واقف په سرپرستی ، د مالي او اداري مرستیال سلاکار امینالله ژواکمل، د بودیجې آمر حامد شفیق، د مالي او اداري مرستیال سلاکار قاري صبغت الله احمدی، او د اجارې او پانګونې عمومي ریاست د اجارې برخې مسؤلینو ګډون کړی و، د ځانګړې شوې بودیجې د منظمې وېش او هدفمند مصرف په اړه مفصل بحث وشو، تر څو پلان شوي موخې په اغېزناک او شفاف ډول ترلاسه شي.
د مالیې وزارت د کال منځنۍ ارزونې پر بنسټ، د یاد پروګرام د پليکېدو لپاره اته میلیونه افغانۍ ځانګړې کړې ده. همدارنګه، که چېرې یادې ځمکې امارتي تثبیت شي، نو ټاکل شوې چې د کرنې وزارت او مخابراتي شرکتونو ترمنځ په یو جامع تړون کې شاملې شي.
