د لومړي ځل لپاره په ننګرهار کې د څارویو التراساونډ معاینات پېلېږي
په ننګرهار کې د لر سپین غر د کرنې او مالدارۍ خصوصي شرکت د لومړي ځل لپاره په ننګرهار کې د څارویو الټراسانونډ(ټلویزیوني معاینې) ماشینونه وارد کړي؛ ترڅو د څارویو د ناروغیو تشخیص وشي.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې د لر سپین غر شرکت له لورې دمالدارۍ سکتور پیاوړتیا لپاره څارویو الټراساونډ نوي ټکنالوژي وارد کړېده چې د څارویو دداخلي ناروغیو دقیق تشخیص په برخه کې ګتور تمامیدلي شي.
ښاغلي محسن وویل نن عملآ د ختیځ زون ۶۰ تنو وترنر ډاکترانو ته ددې ټکنالوژي د استعمال په برخه کې روزنه ورکړل شوه.
نوموړې وترنر داکترانو او د شرکت مسؤلینو ته ددې ډول معایناتو د دودولو او لري پرتو سیمو مالدارانو ته د چوپړتیاوو وړاندې کولو سپارښتنې وکړې. .
د لر سپین غر شرکت مسؤل استاد توحید علي عظیمي وویل یاده ټکنالوژي د اروپایي هېوادونو دمالدارۍ په فارمونو کې کارول کېږي، چې د افغانستان دګاونډ په ځینو هېوادونو کې هم نشته.
نوموړې وویل د اوس لپاره یي په ختیځ کې وترنر ډاکترانو ته روزنه پیل کړي ده او هڅه کوي دا لړۍ ټول افغانستان ته وغځوي.
ښاغلي عظیمي وویل ددې ټکنالوژۍ په ترویج به د څارویو د داخلي ناروغیو په تشخیص او ځینو نورو برخو کې د داکترانو سره مرسته وکړي؛ ترڅو دڅارویو ښه درملنه وکړي.
